काठमाडौं । सरकारले आगामी असोज १ गतेदेखि अनिवार्यरुपमा इम्बोस्ड नम्बर प्लेट जडान गर्नुपर्ने निर्णय गरेपछि त्यसविरुद्ध ‘जाग नेपाली अभियान’ले आन्दोलनको घोषणा गरेको छ । अभियानले यो निर्णयलाई नेपाली भाषा र संस्कृति, विशेषगरी राष्ट्रिय एकताको प्रतीक देवनागरी लिपिमाथिको योजनाबद्ध आक्रमण भन्दै राष्ट्रघाती कदमको संज्ञा दिएको छ ।
आइतबार रिपोर्टर्स क्लब नेपालमा आयोजित पत्रकार सम्मेलनमा अभियानका संयोजक डा. दीपेश केसीले इम्बोस्ड नम्बर प्लेटमा देश र विदेशका माफिया गिरोह संलग्न रहेको र त्यसकै परिणामस्वरूप देवनागरी लिपि नामेट पार्ने खेल भइरहेको आरोप लगाए । उनले भने, “देवनागरी लिपी यो देशको एकताको प्रतीक हो । तराई, पहाड र हिमालका सबै समुदायले बुझ्ने, चिन्नेसम्मको साझा लिपि हो । यसलाई मेटाएर जात, जाति, भाषा र संस्कृतिलाई टुक्रा–टुक्रा पार्ने, भिडाउने र अन्ततः देशलाई रगतको आहालमा डुबाउने खेल भइरहेको छ ।”
जाग नेपाली अभियानका अनुसार नेपालीको धर्म, संस्कृति, परम्परा, भाषा र लिपिमाथि लामो समयदेखि योजनाबद्ध आक्रमण हुँदै आएको छ र इम्बोस्ड नम्बर प्लेट त्यसैको पछिल्लो श्रृङ्खला हो । अभियानले यातायात व्यवस्था विभाग र सरकारलाई ठुलो कमिसनको खेलमा फसाइएको आरोप पनि लगाएको छ । अधिवक्ता रामेश्वर राउतले समेत यो प्रक्रियामा ५ खर्ब ४५ अर्ब ५५ करोड रुपैयाँ राज्यकोष हिनामिना भएको दाबी गर्दै, साधारण मूल्यमा बन्ने नम्बर प्लेटलाई अत्यधिक मूल्य तोकिएको बताए ।
नेपाल स्वतन्त्र नागरिक सञ्जालका संयोजक दिनेश सुवेदीले इम्बोस्ड नम्बर प्लेटको प्राविधिक पक्ष समस्या नभए पनि त्यसमा देवनागरी लिपि हटाएर रोमन लिपि प्रयोग गर्न खोजिनु नै आपत्तिजनक रहेको बताए । उनले भने, “यो कदम नेपाल र नेपालीको आत्मा भाषा समाप्त पार्ने दिशामा चालिएको हो, त्यसैले विरोध अपरिहार्य छ ।”
जाग नेपाली अभियानले इम्बोस्ड नम्बर प्लेट बहिष्कार गर्ने मात्र नभई जडानको अवज्ञा गर्न पनि आम नागरिकलाई अपिल गरेको छ । आन्दोलनलाई सफल पार्न अभियानले संघर्षका कार्यक्रम पनि सार्वजनिक गरेको छ । भदौ ९ र १० गते विभिन्न राजनीतिक दल तथा संघ–संस्थालाई ज्ञापनपत्र बुझाइने, ११ गते समाजका प्रतिष्ठित व्यक्तिहरुसँग परामर्श हुने र भदौ १३ गते थप आन्दोलन कार्यक्रम घोषणा गरिने जनाइएको छ ।
डा. केसीले आन्दोलनमा स्वयंसेवकदेखि समाजका प्रतिष्ठित व्यक्तित्वसम्म सहभागी हुने बताएका छन् । उनले देवनागरी लिपि बचाउन सबै नागरिक, पेशाकर्मी, संघ–संस्था एकजुट भई सडक संघर्षमा उत्रन आवश्यक रहेको पनि बताए ।
प्रकाशित मिति: मंगलबार, भदौ १०, २०८२
