काठमाडौं । नेकपा एकीकृत समाजवादीका सम्मानित नेता एवं पूर्वप्रधानमन्त्री झलनाथ खनालले एमसीसी सम्झौतामार्फत नेपाली नेताहरूले राष्ट्रप्रति अभूतपूर्व घात गरेको आरोप लगाएका छन्।
‘नेपाली विशेषताको समाजवाद’ विषयक गोष्ठीलाई सम्बोधन गर्दै खनालले एमसीसी सम्झौता मुलुकलाई विभाजन गर्ने गरी ल्याइएको दाबी गरे। उनका अनुसार, सम्झौतामा उल्लेख गरिएका हरेक सर्त अमेरिकी स्वार्थ र सुरक्षालाई प्राथमिकतामा राखिएका छन्, जसले नेपालको सार्वभौमिकता र स्वतन्त्रतामाथि गम्भीर प्रश्न उठाएको छ।
खनालले भने, “मात्र एउटा वा दुईवटा होइन, मैले १३ वटा दस्तावेज स्वयं अध्ययन गरेको छु। तीमध्ये कुनै पनि दस्तावेजमा ‘अमेरिकी स्वार्थ’ भन्ने वाक्य छुटेको छैन। प्रत्येक बुँदामा अमेरिकी सुरक्षा जोडिनु आत्मघाती कुरा हो। यो राष्ट्रप्रति सामान्य घात होइन, भयानक घात हो।”
उनले थपे कि, एमसीसीलाई सत्ताधारी दलले आफ्ना गुटगत र व्यक्तिगत स्वार्थका आधारमा अघि बढाएको हो, जसले राष्ट्रिय हितलाई कमजोर बनाएको छ। “यो कुनै नीति, सिद्धान्त वा राष्ट्रिय आवश्यकता होइन, केही व्यक्तिको निजी स्वार्थ र लहडको परिणाम हो,” खनालको टिप्पणी थियो।
पूर्वप्रधानमन्त्री खनालले यसरी राष्ट्रिय हितविपरीत सम्झौता गर्ने प्रवृत्ति रोकिनुपर्नेमा जोड दिंदै चेतावनी दिए, “अब एमसीसीजस्तो अर्को गल्ती गर्ने नजिर हामीले बनाउन हुँदैन। यस्तो परिपाटी बदलिएन भने देश अझ गहिरो संकटमा फस्नेछ।”
प्रकाशित मिति: सोमबार, भदौ ९, २०८२
