काठमाडौं । काठमाडौंमा रहेको नीलकमल रिक्रुटमेन्ट सर्भिसेजले पठाएका हजारौं कामदारहरू दुबईमा अलपत्र परेका छन् । संयुक्त अरब इमिरेट्सको दुबई सहरमा रहेको प्रोफाइल नामक सप्लाई कम्पनी र पावर नामक अर्को कम्पनीमा नीलकमलले पठाएका हजारौं नेपाली युवाहरू अलपत्र पर्ने अवस्था आएको हो । आकर्षक तलब सुविधा र काम भनी पत्रिकामा विज्ञापन गरी हजारौंलाई नीलकमलले प्रोफाइलमा पठाएको थियो । तर जब नेपाली युवाहरू मेनपावरको झाँसामा आएर ठूलो रकम बुझाउँदै त्यहाँ पुगे तब छाँगाबाट खसे । प्रति व्यक्ती ३ लाख रुपैयाँका दरले उठाएर नेपाली युवाहरूलाई उज्यालो सपना देखाएर दुबईस्थित प्रोफाइल कम्पनीमा पठाएको नीलकमलले त्यो सबै विज्ञापन फर्जी गरेको त्यहाँ अलपत्र परेका कामदारहरूले बताएका छन् । नेपाली कामदार त्यहाँ पुगेपछि नीलकमलले भनेबमोजिम १५ दिन त चुप लागेर बसे । किनभने त्यहाँ जाने बितिकै नभई जागिर सुरु हुन कम्तीमा १५ दिन लाग्ने नीलकमलले भनेको थियो । तर १५ दिन होइन २ महिना बढी समयसम्म पनि जागिर सुरु नभएपछि हजारौंको संख्यामा नेपालीहरू अलपत्रमा परेको भन्दै झस्किए । जागिर सुरु नभएको मात्रै होइन सुरु भएको जागिर पनि मेनपावर कम्पनीले विज्ञापन गर्दा र अन्तर्वार्ता गर्दा भनेबमोजिमको नभएपछि उनीहरू निराश भएका छन् ।
आफ्नो रकम गइसकेको र आफूहरूले भनेबमोजिमको काम र तलब सुविधा नपाउने स्पष्ट भएपछि त्यहाँ कामदारहरू आपसमा हुलदंगामा उत्रिएका थिए । त्यस्तो हुलदंगाबाट केही कामदार घाइते पनि भएका छन् । प्रोफाइल कम्पनीमा हुलदंगा भएको जानकारी पाएपछि दुबई प्रहरी त्यहाँ पुगेर केही नेपाली कामदारलाई आफ्नो नियन्त्रणमा समेत लिएको दुबईबाट यस घटनाका एक जानकारले आजको न्यूजलाई बताएका छन् । पत्रिकामा आकर्षक तलब सुविधा र काम भन्दै प्रत्येक व्यक्तिबाट ३ लाख रुपैयाँ असुलेको मेनपावरको यो सबै ठगी धन्दा भएको थाहा पाएपछि गएका मध्ये केही कामदारहरूले सामाजिक सञ्जालमार्फत नीलकमल मेनपावरको भण्डाफोर गरिरहेका छन् । यस घटनाबारे जानकारी लिन हामीले दुबईस्थित नेपाली राजदूत तेजबहादुर क्षेत्रीलाई बुझ्न खोज्दा आफूलाई कुनै जानकारी नभएको उनको प्रतिक्रिया थियो ।
आफू र दूतावास यस घटनाबारे वेखबर रहेको मात्रै होइन आफू निरन्तर कार्यक्रममा व्यस्त हुने भएकाले श्रम सहचारीसँग यसबारे बुझ्न राजदूत क्षेत्रीले वाट्सएप म्यासेजमार्फत उर्दी जारी गरे । नेपाली श्रमिकहरूको मुख्य गन्तव्यमध्येको एक युएईमा नेपाली युवाहरूले झेलिरहेको यस्तो समस्या समाधानबारे वेखबर रहेका राजदूत कस्तो कार्यक्रममा व्यस्त भएका हुन् त्यसबारे भने केही बताएनन् । साथै यस्तो घटनाबारे नीलकमल मेनपावर कम्पनीलाई जानकारी लिन खोज्दा सञ्चालक मेघनाथ भुर्तेल विदेशमा रहेको जानकारी आयो । त्यसपछि मेनपावरको आधिकारिक भन्दै फोन सम्पर्कमा आएका सुनिल लामिछानेले यो घटना नीलकमललाई बदनाम गराउन गरिएको षड्यन्त्र भएको बताए । सामाजिक सञ्जालमार्फत आफ्नो कम्पनीको क्रेज घटाउन कसैले षड्यन्त्र गरेको हुन सक्ने उनको आशंका थियो । सञ्चालक भुर्तेल यही घटना सामसुम पार्न दुबईमा रहेको स्रोतले बताएको छ ।
प्रकाशित मिति: आइतबार, भदौ ८, २०८२
