काठमाडौं । नेकपा (एमाले)का उपाध्यक्ष तथा पूर्वअर्थमन्त्री सुरेन्द्र पाण्डेले नेपालको आर्थिक रुपान्तरण र दीर्घकालीन विकासका लागि अन्तर्राष्ट्रिय सहकार्यलाई खुला दृष्टिकोणले हेर्नुपर्ने बताएका छन्।
आइतबार काठमाडौंमा आयोजित एक अन्तरक्रिया कार्यक्रममा उनले पछिल्ला दिनमा मिलेनियम च्यालेन्ज कर्पोरेसन (एमसीसी) परियोजना र चीनको बेल्ट एन्ड रोड इनिसिएटिभ (बीआरआई) लाई लिएर भइरहेको विवादलाई ‘अनावश्यक भावनात्मक बहस’ भनेका छन्।
पाण्डेका अनुसार, नेपाल जस्तो विकासोन्मुख मुलुकले सहयोग र लगानीमा सिमाना खडा गरेर प्रगति गर्न सक्दैन। “हामीलाई बीआरआई पनि चाहिन्छ, एमसीसी पनि चाहिन्छ। जति धेरै सहयोग आउँछ, त्यति नै हाम्रो विकास अघि बढ्छ। एउटा लिएर अर्को अस्वीकार गर्ने तर्कको कुनै आधार हुँदैन,” उनले स्पष्ट पारे।
सैनिक अड्डाको हल्ला निराधार
पछिल्ला वर्षमा एमसीसी सम्झौताबारे केही राजनीतिक दल र समूहले ‘अमेरिकी सैनिक अड्डा नेपालमा बस्ने’ दाबी गर्दै विरोध गर्दै आएका छन्। पाण्डेले त्यस्तो अड्कलबाजीलाई तथ्यविहीन भन्दै खारेज गरे।
उनले प्रश्न गरे, “एमसीसी कार्यान्वयन हुँदा नेपालमा अमेरिकी सैनिक अड्डा बस्छ भनिन्छ। तर अहिले सम्म त्यस्तो केही भएको छ? यदि वास्तवमै त्यस्तो खतरा हुन्थ्यो भने नेपाल त पहिल्यै कोलोनाइज भइसकेको हुन्थ्यो नि।”
पाण्डेका अनुसार, एमसीसीबारे फैलाइएका गलत प्रचारभन्दा पनि ‘आफ्नै मनमा बस्ने डर र भ्रम’ नै ठूलो समस्या हो। उनले भने, “त्यो वनको बाघले भन्दा पनि मनको बाघले खाएको हो।”
छिमेकीसँग स्पष्ट कूटनीति आवश्यक
कार्यक्रममा उनले नेपालले आफ्ना छिमेकी मुलुकहरूसँगको सम्बन्धबारे पनि स्पष्ट नीतिगत धारणा बनाउनुपर्नेमा जोड दिए। उनका अनुसार, ‘कसलाई लिनु र कसलाई नलिनु’ भन्ने भावनात्मक दृष्टिकोणले नेपाललाई घाटा मात्रै पुर्याएको छ।
“अमेरिका वा चीनले नेपालमार्फत मात्र आफ्नो लक्ष्य पुरा गर्छन् भन्ने सोच गलत हो। चीनलाई हामीले जोगाउने कुरा हावादारी हो। चीन आफैं जोगिन सक्छ। त्यसैले हाम्रो प्राथमिकता भनेको राष्ट्रहितलाई आधार बनाएर सहयोग स्वीकार गर्नु हो,” उनले भने।
समृद्धिका लागि सबैसँग साझेदारी
पाण्डेले नेपालको दीर्घकालीन विकास र पूर्वाधार निर्माणका लागि विभिन्न स्रोतबाट आउने सहयोगलाई अस्वीकार नगर्न आग्रह गरे। उनका अनुसार, वैदेशिक सहयोगलाई राजनीतिक नाफा–नोक्सानको दृष्टिले हैन, राष्ट्रिय हित र जनताको समृद्धिको आधारमा हेर्नुपर्छ।
उनले जोड दिए, “नेपाललाई समृद्ध बनाउन सबै किसिमको सहयोग अपरिहार्य छ। वैदेशिक सहयोग माग्नु हाम्रो आवश्यकता हो, कमजोरी होइन।”
प्रकाशित मिति: आइतबार, भदौ ८, २०८२
