काठमाडौं । शिक्षा विधेयकमा आफ्ना माग सम्बोधन नगरिएको भन्दै नेपाल शिक्षक महासंघले चरणबद्ध आन्दोलनको कार्यक्रम सार्वजनिक गरेको छ । महासंघले शुक्रबार काठमाडौंमा पत्रकार सम्मेलन गरी आन्दोलनका पहिलो चरणका कार्यक्रमहरू सार्वजनिक गरेको हो ।
महासंघले जनाएको अनुसार पहिलो चरण अन्तर्गत भदौ ९ गते प्रधानमन्त्री, शिक्षामन्त्री तथा संसदमा रहेका प्रमुख दलका सचेतकलाई ध्यानाकर्षण पत्र बुझाइने छ । यस दिनबाट औपचारिक रूपमा आन्दोलनको शुरुवात हुने महासंघका पदाधिकारीहरूले जानकारी दिए ।
त्यसपछि भदौ ११ गतेदेखि २० गतेसम्म देशभर केन्द्रस्तरमा रहेका सबै राजनीतिक पार्टीका केन्द्रीय कार्यालयहरूमा पनि ध्यानाकर्षण पत्र बुझाइने छ । त्यही अवसरमा प्रतिनिधिमूलक रूपमा दुई घण्टासम्म धर्ना दिने कार्यक्रम समेत तय गरिएको छ ।
भदौ १३ गते मुलुकभरका सबै स्थानीय तहमा तथा भदौ १५ गते सबै जिल्लाका समन्वय इकाइमा पनि शिक्षक महासंघका प्रतिनिधिहरूले ध्यानाकर्षण पत्र बुझाउने र दुई घण्टासम्म प्रतीकात्मक धर्ना दिने भएका छन् । महासंघले यसलाई दबाब सिर्जना गर्ने पहिलो चरणको संयमित कार्यक्रमका रूपमा व्याख्या गरेको छ ।
महासंघका पदाधिकारीहरूले भनेका छन्, “हामीले सरकारसँग वार्तामार्फत समाधान खोज्ने प्रयासलाई निरन्तरता दिएका छौं । तर हाम्रो जायज मागलाई बेवास्ता गरियो भने दोस्रो चरणको आन्दोलन कडा र अवरोधात्मक हुनेछ ।”
यही कारणले महासंघले भदौ २१ गते दोस्रो चरणको आन्दोलनका कार्यक्रमहरू सार्वजनिक गर्ने निर्णय गरेको छ । त्यस चरणमा सडक आन्दोलन, विरोध प्रदर्शनदेखि अवरोधात्मक कदमसम्मका कडा कार्यक्रम ल्याइने महासंघका नेताहरूले चेतावनी दिएका छन् ।
शिक्षक महासंघले लामो समयदेखि शिक्षा विधेयकमा संशोधन गर्नुपर्ने, शिक्षकहरूको सेवा–सुविधा, स्थायित्व र पेशागत मर्यादाबारे माग उठाउँदै आएको छ । तर, विधेयकमा ती माग सम्बोधन नभएकाले बाध्य भएर आन्दोलनमा उत्रनु परेको महासंघको तर्क छ ।
प्रकाशित मिति: शुक्रबार, भदौ ६, २०८२
