काठमाडौं । प्रधानमन्त्री केपी शर्मा ओलीलाई भारत भ्रमणका लागि औपचारिक निमन्त्रण दिन भारतीय विदेश सचिव विक्रम मिश्री आज दिउँसो १ बजे भारतीय वायुसेनाको विमानमार्फत काठमाडौं आइपुग्दै छन् ।
उनले आगमनलगत्तै परराष्ट्र सचिव अमृतबहादुर राईसँग भेटवार्ता गर्ने कार्यक्रम छ । त्यसपछि प्रधानमन्त्री ओली, परराष्ट्रमन्त्री डा. आरजु राणा लगायत उच्चपदस्थ व्यक्तित्वहरूसँग शिष्टाचार भेट गर्ने तयारी छ ।
प्रधानमन्त्रीसँगको भेटमा मिश्रीले भारतीय प्रधानमन्त्री नरेन्द्र मोदीको तर्फबाट भारत भ्रमणको आधिकारिक निम्तो हस्तान्तरण गर्नेछन् । प्रधानमन्त्री ओली भदौ ३१ गते भारत भ्रमणमा जाने योजना रहेको बताइएको छ ।
यस अवसरमा नेपाल–भारत साझेदारीका विभिन्न पक्षमा दुई देशका परराष्ट्र सचिवबीच छलफल हुने परराष्ट्र मन्त्रालयले जनाएको छ । कनेक्टिभिटी, विकास सहयोग, आपसी हितका मुद्दा र द्विपक्षीय सम्बन्ध मजबुत बनाउनका विषयमा वार्ता हुने उल्लेख छ ।
भारतको विदेश मन्त्रालयले पनि नेपालसँगको सम्बन्धलाई उच्च प्राथमिकता दिँदै बलियो मैत्रीपूर्ण साझेदारीलाई अझ प्रगाढ बनाउन चाहेको जनाएको छ ।
प्रधानमन्त्री बनेको १४ महिनापछि ओलीको पहिलो भारत भ्रमण हुन लागेको हो । यसपटक प्रधानमन्त्री मोदी र ओलीबीच बिहारको बोधगयामा विशेष भेटवार्ता गर्ने तयारी भइरहेको छ, जहाँ बुद्धले ज्ञान प्राप्त गरेका थिए ।
प्रकाशित मिति: आइतबार, भदौ १, २०८२
