काठमाडौं । नेपाली कांग्रेसले संविधान संशोधनका लागि अन्य राजनीतिक दलसँग संवाद गर्ने कार्यदलको संयोजकमा वरिष्ठ नेता कृष्णप्रसाद सिटौलालाई प्रस्ताव गर्ने अन्तिम तयारी गरेको छ।
पार्टीको केन्द्रीय समिति बैठकको निर्णयअनुसार गठन हुन लागेको कार्यदलमा ५ देखि ७ जना सदस्य रहनेछन्। मुख्य सचिव कृष्णप्रसाद पौडेलका अनुसार कार्यदलको औपचारिक घोषणा दुई–तीन दिनभित्र हुनेछ।
संविधान निर्माण प्रक्रियामा सक्रिय भूमिका निभाएका पूर्व महामन्त्री सिटौलालाई संयोजक बनाउने विषयमा कांग्रेसभित्र गहन छलफल भइरहेको एक शीर्ष नेताले जानकारी दिएका छन्। कार्यदलले अन्य दलका नेतासँग मात्र होइन, विज्ञ, विशेषज्ञ र नागरिक समाजका प्रतिनिधिसँग समेत भेटवार्ता गरी संविधान संशोधनका विषयमा पार्टीभित्र विस्तृत छलफल गर्ने जिम्मेवारी पाउनेछ।
अनलाइनखबरसँगको संक्षिप्त प्रतिक्रियामा नेता सिटौलाले भने, “छलफलपछि मात्र यो विषय टुंगो लाग्छ। जिम्मेवारी दिइएमा नबस्ने भन्ने कुरा छैन।”
प्रकाशित मिति: शुक्रबार, साउन २४, २०८२
