काठमाडौं । नेकपा माओवादी केन्द्रभित्र पछिल्ला दिनमा आन्तरिक बहस चर्किँदै गएको छ । पार्टी नेतृत्व र संगठनगत कमजोरीका विषयमा स्थायी कमिटी बैठक निरन्तर भइरहेको छ । यसै क्रममा अध्यक्ष पुष्पकमल दाहाल ‘प्रचण्ड’ ले गल्ती गर्ने नेताले खुलस्त आत्मालोचना गर्नुपर्ने बताएका छन्।
आइतबार पार्टीको स्थायी कमिटी बैठकपछि संक्षिप्त रुपमा सञ्चारकर्मीहरूसँग कुरा गर्दै प्रचण्डले भने,
“अहिले पनि छलफल जारी छ, तर जसले गल्ती गरेको छ, उसैले आत्मालोचना गर्ने कुरा हो।”
जनार्दन शर्माको वक्तव्यपछि चर्कियो बहस
बैठकमा उपमहासचिव जनार्दन शर्माले पार्टी बिग्रनुको प्रमुख जिम्मेवारी अध्यक्ष प्रचण्डको भएको संकेत गर्दै भनेका थिए,
“अध्यक्षले आफ्नो जिम्मेवारी लिने हो भने म पनि आत्मालोचना गर्न तयार छु।”
शर्माको यस अभिव्यक्तिपछि बैठकमा सहभागी नेताहरूबीच वाकयुद्ध चलेको स्रोत बताउँछ । कतिपय नेताहरूले शर्मामाथि पार्टी गतिविधि कमजोर बनाउने काममा प्रत्यक्ष संलग्न भएको आरोप लगाउँदै, आत्मालोचना गर्न उनी नै अघि सर्नुपर्ने बताएका थिए।
स्थायी कमिटीमा बढ्दो असन्तुष्टि
माओवादी केन्द्रभित्र हाल संगठन विस्तार, सरकार सञ्चालनमा भूमिका र आन्तरिक समन्वय कमजोर भएको विषयमा असन्तुष्टि बढेको छ।
बैठकमा सहभागी एक नेताले नाम नखुलाउने सर्तमा भने,
“पार्टी भित्रको अनुशासन र निर्णय कार्यान्वयनमा कमजोरी देखिएको छ, त्यसैले आत्मालोचनाको वातावरण सिर्जना भएको हो।”
अध्यक्ष प्रचण्डको ताजा अभिव्यक्ति पनि यही सन्दर्भमा आएको हो । उनका अनुसार पार्टीभित्र समस्या समाधानको बाटो भने खुला छलफल र गल्ती स्वीकारद्वारा मात्रै सम्भव छ।
पार्टी सुधारको दबाब
अहिले स्थायी कमिटी बैठक निरन्तर चलिरहेको छ। नेताहरूबीचको आरोप–प्रत्यारोप र आत्मालोचनाको वातावरणले माओवादी केन्द्रको नेतृत्वसमेत दबाबमा परेको देखिन्छ।
प्रचण्डले अन्त्यमा भनेका छन्,
“आत्मालोचना र सुधारको बाटो छाडेर पार्टी अघि बढ्दैन। जसको गल्ती छ, ऊ जिम्मेवारी लिनैपर्छ।”
प्रकाशित मिति: आइतबार, साउन १९, २०८२
