काठमाडौं । संघीय मामिला तथा सामान्य प्रशासनमन्त्रीका रूपमा नियुक्त भएकी भगवती न्यौपानेले आफू कुनै लोभ लालसाबाट मुक्त रही प्रधानमन्त्रीबाट पाएको जिम्मेवारी दृढताका साथ पूरा गर्ने प्रतिबद्धता जनाएकी छन्।
नेपाल प्रेससँगको कुराकानीमा उनले भनिन्, “मलाई कुनै लोभ छैन। प्रधानमन्त्रीज्यूले जिम्मेवारी दिनुभएको छ, त्यसलाई इमानदारीका साथ पुरा गर्छु। संघीयता कार्यान्वयनको मुख्य जिम्मेवारी यही मन्त्रालयसँग जोडिएको छ, त्यसैले सुशासन र प्रभावकारी प्रशासन निर्माणमा म केन्द्रित हुनेछु।”
राजकुमार गुप्ताको घुस प्रकरण सार्वजनिक भएपछि राजीनामा दिएपछि न्यौपानेलाई संघीय मामिला मन्त्रालयको नेतृत्वमा ल्याइएको हो।
मन्त्री न्यौपानेले संघीय निजामती सेवा विधेयकलाई चाँडै संसदबाट पारित गराउने योजना रहेको बताइन्। उनका अनुसार विधेयकमाथि सैद्धान्तिक छलफल भइसकेको छ र ७२ घण्टे संशोधन दर्ताको सूचना अवधि पनि सकिएको छ। अब विधेयन व्यवस्थापन समितिमा प्रक्रिया अघि बढ्नेछ।
उनले भनिन्, “राष्ट्रिय सभा नियमावली अनुसार विधेयक २ महिनाभित्र टुंगो लाग्नुपर्नेछ। त्यसअनुसार हामी २ महिनाभित्र विधेयक पारित गराउने तयारीमा छौं।”
त्यसैगरी उनले देशभरका निमित्त प्रमुखको भरमा चलिरहेका स्थानीय तहलाई नियमित नेतृत्वमा ल्याउन निर्देशन दिइसकेको जानकारी दिइन्।
“संघीयता कार्यान्वयनको आधारभूत एकाइ स्थानीय तह हो। तर अहिले पनि ७५३ मध्ये ११६ स्थानीय तह निमित्त प्रमुखकै भरमा चलिरहेका छन्,” मन्त्री न्यौपानेले भनिन्, “यी सबै तहलाई जतिसक्दो चाँडो नियमित नेतृत्वमा ल्याउन मन्त्रालयले तयारी थालेको छ।”
उनले मन्त्रालयका महाशाखा तथा शाखाहरूलाई आवश्यक विवरण संकलन गर्न निर्देशन दिइसकेको जानकारी पनि दिइन्।
प्रकाशित मिति: शुक्रबार, साउन ३, २०८२
