गायिका नीता आचार्यको स्वरमा रहेको गीत ‘चुप चाप’ सार्वजनिक भएको छ । विश्व साइकल यात्री पुस्कर शाहको शब्द, शंकर थापा ‘स्माइल’को संगीत, विश्व अधिकारीको एरेञ्ज र कुमार केसीको मिक्सिङ/माष्टरिङ रहेको गीतको भिडियो सार्वजनिक भएको हो ।
किरण श्रेष्ठद्वारा निर्देशित गीतको भिडियोमा अभिनेत्री शर्मिला मल्ल र पुस्कर शाहलाई फिचरिङ गरिएको छ । प्रताप सिंहको छायाङ्कन रहेको भिडियोमा बुद्धि तामाङको शृंगार रहेको छ । गीतको भिडियो नीता आचार्यको अफिसियल युट्युब च्यानलमार्फत सार्वजनिक गरिएको छ ।
गीत जति राम्रो छ गीतको भिडियो पनि त्यतिकै उत्कृष्ट बनेको छ । ‘हामी सबैको मिहिनेतले एउटा राम्रो गीत र यसको भिडियो श्रोता/दर्शकमाझ पस्किएका छौं, आशा छ सबैले मन पराइदिनुहुनेछ’, गायिका आचार्य भन्छिन् ।
आचार्यका ‘जिन्दगी, सँगै जिउने हो भए साथमा नभए यादमा’, ‘झिमझिम परेली’, ‘गरिदेउ बिदा’ र ‘मनको धोको’ जस्ता गीत श्रोता/दर्शकमाझ लोकप्रिय छन् ।
नेपालबाहिर अमेरिकामा बस्दै आएकी आचार्यले सबै प्रकारका गीत गाउँदै आएकी र गीत गाउनकै लागि नेपाल आउने गरेकी छन् l ‘सबै खालका गीत गाउन मन पराउने आचार्य आफ्नो जन्मभूमि र नेपाली गीतसंगीतलाई अगाध माया गर्छिन् ।
मायाप्रेमका गीत, आधुनिक र लोक फ्युजन भएका गीत अलिक बढी गाएकी आचार्यका सबै किसिमका गीतमा स्वरले न्याय प्रदान गरेको पारखीहरूको भनाइ रहेको छ l रारा राष्ट्रिय म्युजिक अवार्डबाट उत्कृष्ट गायिकाको सम्मान पाएकी नीता गीतसंगीतको साधनमा समर्पित हुन पाउँदा गर्व र खुशी लाग्ने बताउँछिन् l
प्रकाशित मिति: आइतबार, फागुन २०, २०८० ११:३२
