पोखरा । ‘मेरो रुख म काट्छु’ अभियानप्रति पोखरा महानगरपालिकाका मेयर धनराज आचार्यले गम्भीर ध्यानाकर्षण भएको जनाएका छन् । रुख काट्ने अभियान सम्बन्धमा स्थानीय सरकार सञ्चालन ऐन बमोजिम महानगरपालिकाबाट कुनै निर्णय नभएको भन्दै उनले रुख काट्ने काम नगर्न नगराउन भनेका छन् ।
मेयर आचार्यले भने, ‘आफ्नो रुख आफै काटौँ अभियान भनेर रुख काट्न आह्वान गरेको भन्ने सूचना प्रकाशित भएको सन्दर्भमा यस सम्बन्धमा स्थानीय सरकार सञ्चालन ऐन बमोजिम महानगरपालिकाबाट कुनै निर्णय नभएकोले सो सम्बन्धी कुनै पनि कार्य (रुख काट्ने फाँड्ने) नगर्नु नगराउनु हुन सम्बन्धित सबैलाई जानकारी गराई सकिएको छ । भ्रममा नपर्नु हुन अनुरोध छ ।’
यसअघि पोखरा महानगरको वडा नं. १९ क्षेत्रमा बाँदरले दुःख दिएको भन्दै वडाले ‘मेरो रुख म काट्छु’ अभियान चलाउने भनेको थियो । वडा कार्यालयले सोमबार सूचना जारी गर्दै १० दिन भित्र मेरो रुख म काट्छु भन्ने अभियान सञ्चालन गरी आ–आफ्नो घर वरपर रहेका सम्पूर्ण रुखहरू काट्न भनेको थियो ।
पोखरा महानगरपालिका साबिक लामाचौर पुरुन्चौर क्षेत्र बाँदरबाट अति प्रभावित क्षेत्र भएको र हाल प्रदेश सरकारले आर्थिक वर्ष २०८०/०८१ को नीति तथा कार्यक्रममा समेत बाँदर नियन्त्रण सम्बन्धी नीति पास गरेको जनाउँदै वडा अध्यक्ष पुष्पेन्द्र पाण्डेले प्रदेश सरकारको नीति तथा कार्यक्रम र बाँदर नियन्त्रणमा सहयोग पुर्याउन भन्दै सूचना जारी गरेका हुन् । सामाजिक सञ्जालमा भाइरल भइरहेको उक्त निर्णयको अहिले चौतर्फी आलोचना भइरहेको छ ।
प्रकाशित मिति: मंगलबार, माघ १६, २०८० १२:१८
