भोजपुर : म्याद गुज्रिएका सामग्रीहरू बढी नै पाइन थालेपछि भोजपुरको स्थानीय प्रशासन अहिले बजार अनुगमनमा कडाइ गर्ने अवस्थामा पुगेको छ ।
विगतमा बजार अनुगमन नाममा मात्र सीमित बनेको गुनासो आइरहँदा अहिले भने गाउँगाउँमा समेत स्थानीय प्रशासनले उपस्थिति देखाउन थालेको हो । जिल्ला प्रशासन कार्यालयले विगतमा बजार केन्द्रित अनुगमन गरे पनि अब ग्रामीण क्षेत्रका ठुला बजारमा पनि अनुगमन गरिने भोजपुरका सहायक प्रमुख जिल्ला अधिकारी उपेन्द्र न्यौपाने बताउँछन् ।
गाउँपालिकाहरू सञ्चालनमा आएसँगै ग्रामीण क्षेत्रमा समेत चहलपहल बढेकाले स्थानीय प्रशासन पनि गाउँ केन्द्रित बन्न थालेको हो । जिल्ला प्रशासनले सदरमुकामको दक्षिणमा रहेको रामप्रसाद राई गाउँपालिकामा रहेका बजारहरूको बुधबार अनुगमन गरेको छ ।
सो क्रममा गाउँपालिकाको वडा नम्बर ६ बैकुण्ठे बजारबाट गरिएको बजार अनुगमनबाट १७ हजार नौ सय ३० रुपैँया बराबरको म्याद गुज्रिएका सामग्री बरामद भएको जिल्ला प्रशासन कार्यालयले जनाएको छ ।
जिल्ला प्रशासन कार्यालय भोजपुरका सहायक प्रमुख जिल्ला अधिकारी प्रयास भट्टराईको नेतृत्वको टोलीले बजार अनुगमनका क्रममा म्याद गुज्रिएका सामग्री फेला पारेको हो । म्याद गुज्रिएका सामग्री फेला परे बरामद गरी नष्ट गरिने र पुनः अर्कोपटक अनुगमन गर्दा ती पसलमा फेरि भेटिएमा कार्बाही गरिने सहायक प्रमुख जिल्ला अधिकारी भट्टराईले जानकारी दिए ।
प्रकाशित मिति: बिहीबार, फागुन ३०, २०७५
-1732776560.jpg)
