बुटवल । राष्ट्रिय प्रजातन्त्र पार्टी (राप्रपा) का अध्यक्ष कमल थापाले विखन्डनकारी गतिविधि गर्ने सीके राउतलाई तत्काल कारबाही गर्न माग गरेका छन् ।
थापाले राउतसँग सरकारले गरेको ११ बुँदे सम्झौता विरोधाभासपूर्ण, अमूर्त र रहस्यमय रहेको बताए । उनले सरकारले गरेको सहमतिमा राउतले कुनै पनि बुँदामा बिखण्डनको एजेन्डा छाडेको नपाइएको र स्वतन्त्र मधेस गठबन्धन विघटन गरेको समेत नदेखिएको उल्लेख गरे ।
पार्टीको मेची महाकाली यात्राका क्रममा रुपन्देहीको बुटबल पुगेका थापाले पत्रकार भेटघाट कार्यक्रममा राउतको फेसबुक स्ट्याटस् र जनकपुरको प्रदर्शनले पनि सहमति रहस्मय रहेको पुष्टि गरेको बताए ।
जनकपुरमा सीके राउतका समर्थकले गरेको प्रदर्शन आपत्तिजनक रहेको र यस्ता विखन्डनकारी गतिविधि हुँदा पनि सरकार कारबाही गर्नुका साटो मुकदर्शक बनेर बसेको भन्दै आपत्ति जनाए ।
यसैगरी उनले नेत्रविक्रम चन्द विप्लवको पार्टीलाई राजनीतिक व्यवहार गरी वार्ताका टेबलमार्फत हल खोज्न आग्रह पनि गरेका छन् । उनले सरकारले विप्लवलाई कमजोर आँकेको भन्दै गम्भीर बन्न सरकारलाई आग्रह समेत गरे ।
प्रकाशित मिति: मंगलबार, फागुन २८, २०७५
-1732776560.jpg)
