काठमाडौँ : प्रधानमन्त्री केपी शर्मा ओलीले राष्ट्रिय अखण्डताका बिषयमा जनमत संग्रह हुनै नसक्ने बताएका छन् । पृथकतावादी समूह आकारमा सानो देखिए पनि खतरा हुन सक्ने भएकाले त्यसलाई नियन्त्रण गर्नु सरकारको दायित्व भएको बाए ।
सिंहदरबारमा आज आयोजित राष्ट्रिय सुरक्षा परिषद् सचिवालयको १८औं वार्षिकोत्सवलाई सम्बोधन गर्दै परिषद् अध्यक्षसमेत रहेको ओलीले यस्तो धारणा व्यक्त गरेका हुन् ।
‘पृथकतावाद सानो भए पनि त्यो घातक हुन्छ । त्यसैले यसलाई सरकारले महत्व दिएर नै निस्तेज पारेको हो,’ ओलीले भने, ‘राष्ट्रिय अखण्डताका बिषयमा जनमत संग्रह हुनै सक्दैन । यस विषयमा कसैले चिन्ता नगरे हुन्छ ।’
प्रधानमन्त्री ओलीले पृथकतावादको अन्त्य हुँदा एकथरि मान्छे मुर्मुरिएको देखेर आफू आश्चर्यमा परेको जनाए । भने, ‘नेपालबाट पृथकतावादी गतिविधि अन्त्य हुन लाग्दा हुँदा एकथरि मान्छे पानीबिनाको माछा जस्तो भुटभुटिएका छन् ।’
‘राष्ट्रिय अखण्डता र सार्वभौमसत्तामा आँच पु¥याउने कुरामा जनमत संग्रहको सोच्न पनि मिल्दैन’ भन्दै ओलीले विभिन्न आवरणमा चन्दा लिने, लुटपाट गर्ने कुरा सरकारलाई मान्य नहुने धारणा राखे ।
देशको शान्ति सुरक्षा र अमनचयन खल्बल्याउने कुनै गतिविधि सरकारलाई मान्य नहुने प्रधानमन्त्रीको स्पष्टोक्ति थियो । ओलीले भने, ‘कोही मृत संस्था जीवित गराउने सपना देख्छन्, कोही क्रान्तिका नाममा जनता अल्मल्याउने कुरा गर्छन् । ती दुवै कुरालाई निस्तेज पारिन्छ ।’
देशको अखण्डता, सार्वभौमसत्ताको रक्षा र राष्ट्रिय सुरक्षाका लागि सुरक्षा परिषद्ले निर्वाह गरेको भूमिकाको प्रधानमन्त्री ओलीले प्रशंसा गरे ।
प्रकाशित मिति: सोमबार, फागुन २७, २०७५
-1732776560.jpg)
