रसुवा : नेपाली कांग्रेसको वरिष्ठ नेता रामचन्द्र पौडेलले झापामा केपी ओली संलग्न तत्कालीन मालेले सुरु गरेको हिंसात्मक द्वन्द्वलाई प्रचण्डले बढावा दिएको आरोप लगाएका छन् । अहिले दुवै नेताले नेतृत्व गरेको सरकारले विप्लवको हिंसात्मक द्वन्द्वलाई रोक्न नखोज्नु रहस्यमय विषय भएको उनको भनाइ छ ।
आज रसुवामा नयाँ शक्ति नेपालका प्रदेश सांसदसहितको टोली नेपाली कांग्रेसमा प्रवेश कार्यक्रममा बोल्दै उनले कम्युनिष्टहरूले हिंसा रोक्न नखोज्नु रहस्यमय भएको बताएका हुन् । उनले भने, केपी ओलीसमेत संलग्न भएको पार्टीले झापाबाट सुरु गरेको हिंसात्मक द्वन्द्वलाई प्रचण्डले देशव्यापी बनाए अहिले विप्लवको हिंसात्मक द्वन्द्वलाई बेवास्ता गरिरहेका छन् । योभन्दा रहस्य अरु के हुन्छ ?’
वरिष्ठ नेता पौडेलले कम्युनिष्टहरूले क्रान्ति मान्छेको टाउको काटेर सुरु गरेको तर कांग्रेसले क्रान्तिको सुरुवात हलो जोतेर गरेको स्मरणसमेत गरे । नेता पौडेलले कम्युनिष्टहरूले वास्तविकता महसुस गर्नेवित्तिकै कांग्रेसमा प्रवेश गर्नेहरूको लर्को लाग्ने दाबी पनि गरे । साम्यवादको सपना देख्ने मान्छेहरूले साम्यवाद मिथ्या रहेछ भन्ने महसुस गर्न थालेको पनि पौडेलको भनाइ थियो ।
पौडेलले देशको समृद्धिको यात्रा कम्युनिष्टबाट संभव नहुने दाबी पनि गरे । पौडेलले भने, ‘प्रधानमन्त्रीजीले समृद्धिको जग बसाएको भाषण गर्नुभएको छ । आमनागरिकले महसुस गर्नुभएको छ । के आज समृद्धिको जग बसेको छ कि के ?’ पौडेलले प्रश्न गरे, ‘समृद्धिको जग भनेको वाइडबडीमा चार अर्ब, एनसेल काण्ड अनि सुन काण्ड हुन् ?’
प्रकाशित मिति: आइतबार, फागुन २६, २०७५
-1732776560.jpg)
