काठमाडौं : मोटरसाइकल चालकहरूले लगाउँदै आएको हेलमेटको गुणस्तर परीक्षण गर्ने तयारी अगाडि बढेको छ । ट्राफिक प्रहरी महाशाखाका अनुसार नेपालमा हुने सडक दुर्घटनामध्ये अधिकांश मोटरसाइकल दुर्घटना हुने गरेको छ । यसरी मोटरसाइकल दुर्घटना हुँदा धेरैको ज्यानै जाने गरेको छ ।
एक अनुसन्धानका अनुसार उपयुक्त हेलमेट लगाएमा मात्र पनि दुर्घटनाबाट हुने क्षति धेरै घट्ने देखिएको छ ।
नेपालमा हेलमेट उत्पादन गर्ने एउटा मात्र कारखाना छ । हेलमेटहरू प्राय: विदेशबाट नै आउने गरेका छन्, जसको गुणस्तर मापन गर्ने गरिएको छैन । मोटरसाइकलमा सवारहरूको सुरक्षाका लागि भन्दै नेपालमा अब चालकले लगाउने हेलमेट सुरक्षाको दृष्टिकोणले उपयुक्त हुने खालको लगाउने नियम तयार भएको छ ।
बुधबार राजधानीमा नेपाल अटोमोबाइल्स एसोसिएसनले आयोजना गरेको कार्यक्रममा गुणस्तर तथा नापतौल विभाग भौतिक प्रयोगशाला शाखाका निर्देशक मणिराम भुसालले हेल्मेटको गुणस्तर परीक्षण गर्ने तयारी भइरहेको बताए । त्यसका लागि विभागले हेलमेटको गुणस्तर परीक्षणसम्बन्धी प्रस्ताव उद्योग, वाणिज्य तथा आपूर्तिमन्त्री मातृका यादवलाई बुझाइसकेको उनले बताए ।
‘दुर्घटनामा प्राय: हेलमेट खुस्किएको हुन्छ । सुरक्षा मापदण्ड पास नगरेको हेलमेट प्रयोगमा रोक लाउनेगरी प्रस्ताव तयार गरेर मन्त्रीलाई बुझाइसकेका छौँ’, फुयाँलले भने । गुणस्तरीय हेलमेट प्रयोग गरे ६९ प्रतिशत गम्भीर चोट हटाउने अध्ययनले देखाएको छ ।
नेपालमा हाल कोहिनूर नामक एउटा मात्र हेलमेट उत्पादन गर्ने फ्याक्ट्री छ, जहाँबाट दैनिक ७०० हेलमेट उत्पादन भइरहेको छ ।
‘चालक नै दुर्घटनाको मुख्य कारण’
महानगरीय ट्राफिक प्रहरी महाशाखाका प्रमुख वरिष्ठ प्रहरी उपरीक्षक (एसएसपी) वसन्त पन्तले सवारी दुर्घटनाको मुख्य कारण चालक नै भएको बताएका छन् । कार्यक्रममा उनले नेपालमा हुने अधिकांश सडक दुर्घटनाको पहिलो र मुख्य कारण चालकको कमजोरी नै हुने गरेको बताए । त्यसपछि सडक इन्जिनियरिङ, मेकानिकल र यात्रुका कारण पनि दुर्घटना हुने गरेको उनको भनाइ थियो ।
प्रकाशित मिति: बुधबार, फागुन २२, २०७५
-1732776560.jpg)
