काठमाडौं : नेपाल तरुण दलका महासचिव भूपेन्द्रजंग शाहीले अहिले सरकारको सर्वसत्तावादी चरित्रविरुद्ध लड्नुपर्ने भन्दै पार्टीभित्र आन्तरिक एकता मजबुत बनाउन आग्रह गरेका छन् । पछिल्लो समय आन्तरिक गुटगत असन्तुष्टिहरु बाहिर आएकोतर्फ चिन्ता व्यक्त गर्दै महासचिव शाहीले यस्तो आग्रह गरेका हुन् । ‘अहिले आन्तरिक गुटगत राजनीति राेकौं । महाधिवेशनमा आ-आफ्ना गुटका पक्षमा लागौला,’ उनले बुधबार सञ्चारकर्मीहरुसँगको छलफलमा भने, ‘तर, अहिले कम्युनिष्ट सर्वसत्तावादसँग लड्नुपर्ने बेला छ । गुटगत स्वार्थ पर राखौं । आन्तरिक एकता मजबुत बनाऔं ।’
उनले सरकारले दैनिकजसो गलत निर्णय र कामहरु गर्दै गइरहेकाले तरुण दल त्यसविरुद्ध सशक्त आन्दोलनको तयारीमा रहेको पनि बताए । सरकार गठन भएको १ वर्षयता जनताले धेरै दुःख पाएको भन्दै सरकारलाई सच्याउन आन्दोलनको आँधीबेहेरी सिर्जना गर्ने बताए । सरकारलाई बारम्बार खबरदारी गर्दा पनि शान्ति सुरक्षा, सुशासन र समृद्धिका पक्षमा काम गर्न नसकेको उनको आरोप थियो ।
‘पहिलो वर्ष हामीले सरकारलाई खबरदारी गर्दागर्दै कैयौ गलत काम भएको छ । लोकतन्त्रको घाँटी निमोठ्ने सरकार विरुद्ध अब ठूलो आन्दोलन गर्छौ ,’ शाहीले भने,‘ काठमाडौंमा १ लाख तरुण उतार्ने गरी आन्दोलनको तयारीमा छौं ।’
प्रकाशित मिति: बुधबार, फागुन २२, २०७५
-1732776560.jpg)
