काभ्रेपलाञ्चोक ः बेथानचोक गाउँपालिका–२ मा एक पुजारीको लडेर मृत्यु भएको छ । मुक्तेश्वर महादेव मन्दिरका पुजारी ४२ वर्षीय हरिप्रसाद तिमल्सिनाको गाउँपालिका कार्यालयको छतबाट खसेर मृत्यु भएको हो ।
पुजारी तिमल्सिनाको उपचारार्थ धुलिखेल अस्पताल लैजाने क्रममा मंगलबार राती बाटोमै मृत्यु भएको प्रहरी चौकी ढुङ्खर्कका प्रहरी सहायक निरीक्षक कृष्ण थापाले जानकारी दिए । उनका अनुसार मन्दिरसँगै रहेको गाउँपालिका कार्यालयको माथिल्लो तलामा पुजारी तिमल्सिना बस्दै आएका थिए ।
पुजारीलाई छतबाट खसेको देखेपछि स्थानीयले प्रहरीलाई खबर गरेका थिए । घटनाको अनुसन्धान भइरहेको प्रहरीले जनाएको छ । केही वर्षअघि वृद्धाश्रम सञ्चालन गरिएको उक्त भवनमा अहिले गाउँपालिकाको कार्यालय बसेको छ ।
प्रकाशित मिति: बुधबार, फागुन २२, २०७५
-1732776560.jpg)
