काठमाडाैँ : गत माघ महिनामा १२० महिलामाथि हिंसा भएको घटना सार्वजनिक भएकाे छ ।
महिला पुनः स्थापना केन्द्र (ओरेक)ले कार्यालयमा अभिलेखीकरण भएका र सञ्चारमाध्यममा प्रकाशित तथ्याङ्कका आधारमा सो विवरण सार्वजनिक गरेको हो । महिला हिंसाका घटनामध्ये ३५ शारीरिक हिंसा, २८ बलात्कार, १७ मानसिक हिंसा, ११ स्रोत सुविधाबाट वञ्चित, नौ हत्या, छ यौन दुर्व्यवहार , छ हत्या र बलात्कारको प्रयास तथा अन्य आठ विभिन्न हिंसा भएको तथ्याङ्क अभिलेखीकरण गरिएको छ ।
हिंसा प्रभावितमध्ये १७ देखि २५ वर्ष उमेर समूहका महिलामाथि सबैभन्दा बढी हिंसा भएको आरेकद्वारा आज जारी विज्ञप्तिमा उल्लेख छ । त्यसैगरी २६ देखि ३५ वर्ष उमेर समूहका ३० प्रतिशत, १६ वर्ष मुनिका २२ प्रतिशत, ३६ देखि ४५ वर्ष उमेरका नौ प्रतिशत र ४५ वर्षदेखि माथिका तीन प्रतिशत महिला हिंसामा परेको तथ्याङ्क छ ।
हिंसामा परेका महिलामध्ये सबैभन्दा बढी ३६ प्रतिशत श्रीमान्बाट, २५ प्रतिशत छिमेकीबाट, १६ प्रतिशत परिवारका सदस्यबाट, १२ प्रतिशत अपरिचित व्यक्ति, सात प्रतिशत साथीबाट र चार प्रतिशत शिक्षक र आफूले आत्मीय ठानेका साथीबाट हिंसामा परेको ओरेकले जनाएको छ ।
प्रकाशित मिति: सोमबार, फागुन २०, २०७५
-1732776560.jpg)
