काठमाडौं : संस्कृति पर्यटन तथा नागरिक उड्डयनमन्त्री रवीन्द्र अधिकारीसहित ७ जना सवार हेलिकोप्टर दुर्घटनाप्रति नेपाली कांग्रेसले दुःख व्यक्त गरेको छ। कांग्रेस प्रवक्ता विश्वप्रकाश शर्माले विज्ञप्ति जारी गर्दै दुःख व्यक्त गरेका हुन्।
शर्माले विद्यार्थी आन्दोलमा अधिकारीले खेलेको भूमिकाको स्मरण गरेका छन्। उनले दुर्घटनामा निधन भएका सबैप्रति श्रद्धाञ्जलि व्यक्त गर्दै परिवारप्रति समवेदना व्यक्त गरेका छन्।
पढ्नुहोस् विज्ञप्ति :
रवीन्द्र अधिकारी कुनै बेला अनेरास्ववियुको अध्यक्ष छँदा म नेपाल विद्यार्थी संघको सभापति थिएँ। दरबार हत्याकाण्डलगत्तै नेपालको विद्यार्थी आन्दोलनलाई सानातिना विमतिबाट माथि उठाएर लोकतन्त्रका सवालमा सम्पूर्ण एकता को निर्माणमा अर्का अनेरास्ववियुका अध्यक्ष मित्र राजेन्द्र राई र म सँगै रवीन्द्रजीको सक्रिय भूमिका स्मरण गरिरहेको छु।
राजनैतिक रूपमा मेरा आदरणीय साथी रवीन्द्र व्यक्तिगत रूपमा एकै परिवारका सदस्यझैँ थिए। कल्पनासम्म गरेको थिइनँ- यी मिलनसार मित्र रवीन्द्रले यसरी अकस्मात् बिदाई लिनेछन् भनेर। उहाँको निधनले मर्माहत छु, अत्यन्तै दु:ख लागेको छ।
ताप्लेजुङमा भएको हेलिकोप्टर दुर्घटनामा मित्र रवीन्द्रसँगै जीवन गुमाएका सबैको आत्मा शान्तिको कामना गर्दै परिवारजनमा समवेदना प्रकट गर्दछु।
विश्वप्रकाश शर्मा
प्रवक्ता
प्रकाशित मिति: बुधबार, फागुन १५, २०७५
-1732776560.jpg)
