काठमाडौं : अख्तियार दुरूपयोग अनुसन्धान आयोगका आयुक्त राजनारायण पाठकले पदबाट राजीनामा दिएका छन् ।
राष्ट्रपति कार्यालयका प्रवक्ता सहसचिव छबिन्द्र पराजुलीका अनुसार शुक्रबार दिउँसो शीतलनिवास पुगेर उनले राष्ट्रपति विद्यादेवी भण्डारीसमक्ष राजीनामा बुझाएका हुन् । पाठकले भक्तपुरको चाँगुनारायणस्थित नेपाल इन्जिनियरिङ कलेजका सञ्चालकसँग घुस लिएको भिडियो रेकर्डसम्बन्धी समाचार बुधबार साँझ एक अनलाइनले सार्वजनिक गरेको थियो ।
स्वामित्व विवादमा रहेको इन्जिनियरिङ कलेजका सञ्चालक लम्बोदर न्यौपानेले आयुक्त पाठकलाई ७८ लाख रुपैयाँ घुस दिएको समाचार सार्वजनिक भएसँगै सत्तारुढ नेपाल कम्युनिस्ट पार्टीले उनीमाथि महाभियोगको छलफल अगाडि बढाएको थियो तर केही सांसदहरूले भने उनलाई राजीनामा दिन सुझाव दिएका थिए ।
प्रकाशित मिति: शुक्रबार, फागुन ३, २०७५
