काभ्रेपलाञ्चोक : सञ्चार तथा सूचना प्रविधिमन्त्री गोकुलप्रसाद बाँस्कोटाले भ्रष्टाचारी विकासविरोधी भएको बताएका छन् ।
बनेपा नगरपालिका- ११ को कार्यालय भवन उद्घाटन समारोहलाई सम्बोधन गर्दै मन्त्री बाँस्कोटाले भने, भ्रष्टाचारी विकासविरोधी हो । सरकारसँग भ्रष्टाचारमा सहनशीलता रहन्न, जोसुकैले भ्रष्टाचार गरोस्, कदापि मोलमोलाइ र छुट हुन्न ।
उनले भ्रष्टाचारीलाई कानुनी दायरामा ल्याउँदा मुलुकमा भ्रष्टाचार बढ्यो भनेर गलत प्रचार गर्नु दुःखद रहेको पनि बताए । मन्त्री बाँस्कोटाले भने, भ्रष्टाचारीलाई कानुनी दायरामा ल्याउँदा बढ्ने होइन, न्यूनीकरण हुँदै जान्छ । यसबाट भ्रष्टाचारोन्मुख व्यक्ति सचेत रहन्छ, भ्रष्टाचारीलाई सजाय गर्दा भ्रष्टाचार न्यून हुँदै जान्छ ।
उनले अख्तियार दुरूपयोग अनुसन्धान आयोगका कर्मचारीसमेतलाई भ्रष्टाचार आरोपमा नछाडिएको र अन्यका हकमा पनि शंका गर्नु नपर्ने बताए । अर्काे प्रसङ्गमा मन्त्री बाँस्कोटाले यस वर्ष शिलान्यासको वर्ष र संघीयता कार्यान्वयनसँगै अर्काे वर्ष उद्घाटनको वर्ष आउने बताउँदै सडक, पुल, रेल जस्ता ठूलाठूला परियोजना सुरु भइसकेको जानकारी दिए ।
मन्त्री बाँस्कोटाले एक वर्षमा सरकारको उपलब्धि ‘शून्य’ भन्नेको हेर्ने, देख्ने, बुझ्ने र व्यक्त गर्नेमा नै शून्यता रहेको बताए । हामी चार वर्षपछि जनताको मूल्यांकन मात्रै स्वीकार्छौं , उनले भने ।
मन्त्री बाँस्कोटाले काभ्रेपलाञ्चोकको बनेपा- ११ नागीडाँडामा प्रस्ताव गर्न खोजिएको विमानस्थल बनाउन आन्तरिक गृहकार्य भइरहेको बताउँदै भने, नागीडाँडामा एयरपोर्ट बनाउने विषयमा सम्बन्धित निकायमा दबाब दिइरहेका छौँ, यहाँ नभए अन्यत्र विकल्प खोज्नेछौँ ।
कार्यक्रममा प्रदेशसभा सदस्य बसुन्धरा हुमागाईं, बनेपा नगरपालिका प्रमुख लक्ष्मीनरसिंह वादे र उपप्रमुख रेखा दाहालले आफ्नो अवधिमा जनतासँग गरेका वाचा पूरा गर्न जनताको मालिक भएर होइन, सेवक भएर काम गर्ने स्पष्ट पारे ।
