विराटनगर : प्रदेश १ का प्रमुख प्रा.डा. गोविन्दबहादुर तुम्वाहाङले एक वर्षको अवधिमा प्रदेशमा भएका कामको सराहना गरेका छन् ।
मुख्यमन्त्री तथा मन्त्रिपरिषद्को कार्यालयबाट आज यहाँ आयोजित प्रदेश सरकारको एक वर्षे उपलब्धि सार्वजनिकीकरण कार्यक्रमलाई सम्बोधन गर्दै उनले अहिलेसम्म भएका कामप्रति जनता उत्साहित रहेका बताए ।
उनले जनताका चाहना र आवश्यकतामा केन्द्रित भएर काम गरेमा प्रदेशलाई समृद्ध र सुखी बनाउन सकिनेमा जोड दिए । मुख्यमन्त्री शेरधन राईले प्रदेश तहको संरचना विल्कुलै नयाँ भए पनि जनताका काममा लगनशील भएर लागिरहेको दाबी गरे ।
उनले सुशासनमा कसैसँग सम्झौता नगर्ने बताउँदै प्रदेशमा ९० वर्ष पूरा गरेका नागरिकलाई मासिक पाँच हजार रुपैयाँ घरघरमै गएर प्रदान गरिने घोषणा पनि गरे ।
सभामुख प्रदीपकुमार भण्डारीले प्राकृतिक स्रोत र सम्पदामा सम्पन्न यस प्रदेशलाई विकासको बाटोमा डोहोर्याउन प्रदेश सरकार सफल भएकामा खुसी व्यक्त गरे । मुख्यसचिव केदार न्यौपानेले प्रदेश सरकारले मितव्ययीता अपनाएकाले विकास कार्यमा मद्दत पुग्ने विचार राखे ।
त्यस अवसरमा प्रदेशको शान्ति सुरक्षालाई बलियो र सुदृढ बनाउन सुरक्षा निकायलाई सवारी साधन प्रदान गरिएको थियो । ती सवारी साधनका लागि १० करोड ५७ लाख रुपैयाँ खर्च गरिएको थियो । यसैगरी प्रदेश सरकारले एक वर्षको अवधिमा उत्कृष्ट कार्य गर्ने सचिव यज्ञबहादुर खत्री, प्रह्लाद सापकोटा, उपसचिव रवीन्द्र आचार्य, मनोजकुमार यादव, अनिरुद्रप्रसाद साह, खड्गप्रसाद चुँडाललगायत दुई दर्जन कर्मचारीलाई सम्मान गरिएको थियो ।
