पोखरा : नयाँ शक्ति नेपालका संयोजक एवं पूर्वप्रधानमन्त्री डा. बाबुराम भट्टराईले जनअपेक्षाअनुरूप सरकार अघि बढ्न नसकेको बताएका छन् ।
संसदीय पत्रकार मञ्च गण्डकी प्रदेशद्वारा आज पोखरामा आयोजित साक्षात्कार कार्यक्रममा बोल्दै उनले वर्तमान सरकार संघीय लोकतान्त्रिक गणतन्त्र स्थापना भइसकेपछिको सरकार भएकाले जनताले यसबाट धेरै अपेक्षा गरेको बताए ।
सरकारले जनचाहनाअनुरूप क्रमभङ्ग हुने गरी विकासमा फड्को मार्नुपर्ने भए पनि केवल सामान्य क्रमिक विकासका क्रममा अघि बढेको बताउँदै उनले देशको अर्थतन्त्र पनि मजबुत बन्न नसकेको उल्लेख गरे ।
गरीबी, बेरोजगारीको समस्या बढ्दै गएको चर्चा गर्दै डा. भट्टराईले औसत प्रति व्यक्ति आय १० हजार डलर पुर्याउन दुई दशकसम्म आर्थिक वृद्धिदर २ अंकमा बढ्नुपर्ने आवश्यकता औँल्याए ।
निजी क्षेत्रलाई लगानीमा आकर्षित गर्न नसक्दासम्म समृद्धि असम्भव भएको उल्लेख गर्दै उनले लगानीको वातावरण तयार गर्दै अघि बढ्नुको विकल्प नभएको धारणा राखे ।
समृद्धिका लागि सडक, पूर्वाधार विकास आवश्यक रहेको औँल्याउँदै उनले तराई हुलाकीमार्ग, मध्यपहाडी हुलाकीमार्गका साथै उत्तर-दक्षिण जोड्ने गरी कोसी, कालीगण्डकी, कर्णाली करिडोरलगायतको निर्माण कार्यलाई प्राथमिकता दिइनुपर्नेमा जोड दिए ।
नयाँ शक्ति पार्टीले असल राजनीति र समावेशी विकासका लागि जनसंवाद यात्रा जारी राखेको बताउँदै उनले यात्राका क्रममा मध्यपहाडी राजमार्गको निर्माण कार्यको अवलोकन, आसपासको जनजीवनको अध्ययन, समस्याको पहिचान र राष्ट्रिय जीवनका महत्त्वपूर्ण सवालमा सर्वसाधारणसँग संवाद गरिएको जनाए ।
उनका अनुसार यात्रा फागुन १५ गते बैतडीको झुलाघाँट पुगी गोठालापानीमा समापन गरिनेछ ।
