गोरखा : गण्डकी प्रदेशका मुख्यमन्त्री पृथ्वीसुब्बा गुरुङले अब अरूलाई देखाएर विकास र समृद्धिबाट भाग्ने छुट कसैलाई नभएको बताएका छन् ।
गोरखा नगरपालिका- ६ हस्पिटल चोकमा निर्माण गरिएको नेपालका प्रथम शहीद लखन थापामगरको अर्धकदको सालिकको अनावरण कार्यक्रममा उनले नेपाली जनताले पाउनुपर्ने सबै राजनीतिक अधिकार प्राप्त गरिसकेकाले अबको काम विकास र समृद्धि नै भएको उल्लेख गरे ।
तीन तहको सरकार बनेको एक वर्ष बित्नै लाग्दा पनि कर्मचारी समायोजनको काम टुंगिन नसकेको भन्दै मुख्यमन्त्री गुरुङले संघीय सरकारप्रति असन्तुष्टिसमेत जनाए ।
उनले भने, आजका दिनसम्म पनि प्रदेश सरकार, स्थानीय सरकारको कार्यालय व्यवस्थापन भइसकेका छैनन्, वित्तीय स्रोतको बाँडफाँटको कुरा समुचित हुन सकेको छैन, यो प्रदेश सरकारका लागि चुनौती बनेको छ ।
उनले अब देशमा रहेका ७६१ वटै सरकारले शिक्षा, स्वास्थ र रोजगारीको व्यवस्था कसरी गर्न सकिन्छ भन्नेमा ध्यान दिने बेला आएको उल्लेख गरे ।
उनले भने, इच्छाशक्ति र राजनीतिक प्रतिबद्धता चाहिएको छ, त्यो प्रतिबद्धता हामी सबैले गर्नु जरुरी छ ।
