चिप्लेढुङ्गा : पूर्वप्रधानमन्त्री एवं नयाँ शक्ति पार्टीका अध्यक्ष डा. बाबुराम भट्टराईले कुनै पनि व्यवसायको देखासिकी गरेर भन्दा पनि व्यवसायमा ‘इनोभेटिभ’ भएर अगाडि बढ्न सके त्यसबाट उचित प्रतिफल हासिल गर्न सकिने बताएका छन् ।
पोखरा चेम्बर अफ कमर्श कास्कीद्वारा पोखरामा आयोजित देशको समृद्धिमा निजी क्षेत्रको भूमिका विषयक अन्तर्क्रियामा पूर्वप्रधानमन्त्री भट्टराईले उद्यमशीलताबिना कुनै पनि देशको विकास हुन नसक्ने बताए । नेपाल जस्तो लामो समय राजनीतिक अस्थिरताबाट गुज्रिरहेको मुलुकमा अहिलेको स्थायी सरकारले काम गर्नसक्ने आधार भएको भन्दै उनले विकास र समृद्धिलाई केन्द्रबिन्दुमा राखेर काम गर्न सुझाव पनि दिए ।
बहुमतको सरकारले यो अवसरको सदुपयोग गरेर राष्ट्रिय हितका लागि विकासलाई तीब्रता दिनुपर्ने उनको भनाइ थियो । निजी क्षेत्र र राज्यबीचको सम्बन्ध विपरीत ध्रुवको जस्तो भयो भने त्यसले मुलुकको अर्थतन्त्रलाई असर पार्ने भन्दै पूर्वप्रधानमन्त्री भट्टाराईले दुवैबीच आपसी साझेदारी र समझदारीबाट नीति बनाएर अघि बढ्नुपर्ने धारणा राखे । अहिले देशको राष्ट्रिय एजेण्डा नै विकास र समृद्धि भएकाले विकास नीति के ? छिमेकको स्थिति के ? कुन रणनीति लिएर विश्वस्तरमा जाँदा सफल हुन सकिन्छ भन्ने विषयमा ध्यान दिनुपर्छ , उनले भने ।
कार्यक्रममा चेम्बरका अध्यक्ष किसान सुनारले व्यवसायीहरू लगानी गर्न उत्सुक रहेको तर लगानीमैत्री वातावरणको अभाव र बजारको पहिचानमा पनि समस्या देखिएकाले विज्ञको सुझाव आवश्यक रहेको बताए । कार्यक्रममा वस्तुगततर्फका उपाध्यक्ष यामनाथ पौडेलले राज्यको निजी क्षेत्रप्रतिको नीति स्पष्ट नभएसम्म व्यवसायी लगानीका लागि अग्रसर हुन नसकेको धारणा राखे।
