काठमाडौं । नेपाल शिक्षक महासंघले विद्यालय शिक्षा विधेयक समयमै पारित नभए सशक्त आन्दोलनको घोषणा गर्दै सरकारलाई साउन २१ गतेसम्मको अल्टिमेटम दिएको छ।
महासंघका अध्यक्ष लक्ष्मीकिशोर सुवेदी र महासचिव तुलाबहादुर थापाद्वारा जारी संयुक्त विज्ञप्तिमा भनिएको छ, "हालसम्मको समग्र अवस्था हेर्दा राज्यपक्ष फेरि शिक्षक–कर्मचारीहरूलाई धोका दिने र आन्दोलनतर्फ धकेल्ने रणनीतिमा रहेको देखिन्छ।" त्यसैले साउन २१ भित्रै विधेयक पारित गर्न महासंघले सरकारको गम्भीर ध्यानाकर्षण गराएको छ।
विज्ञप्तिमा संसदको शिक्षा, स्वास्थ्य तथा सूचना प्रविधि समितिमा हाल चलिरहेको छलफल यथाशीघ्र टुंग्याई, विगतका सहमति समेटिएको विद्यालय शिक्षा विधेयक प्रतिनिधिसभामा प्रस्तुत गरी पारित गर्न आग्रह गरिएको छ।
यदि तोकिएको म्यादसम्म विधेयक पारित भएन वा सहमति विपरीत प्रावधानसहित अघि बढाइएमा महासंघले विगतभन्दा पनि कठोर र सशक्त आन्दोलनमा जाने चेतावनी दिएको छ। आन्दोलनका चरणबद्ध कार्यक्रमहरू उपयुक्त समयमा सार्वजनिक गरिने महासंघले स्पष्ट पारेको छ।
साथै, आन्दोलनका कारण उत्पन्न हुने जटिल परिणामको सम्पूर्ण जिम्मेवारी राज्यपक्षले लिनुपर्ने महासंघको भनाइ छ।
प्रकाशित मिति: शुक्रबार, साउन ३, २०८२
