काठमाडौँ। कोरोना विरुद्धको खोप लगाउन नपाएको भन्दै वैदेशिक रोजगारीमा जाने तयारी पूरा गरेका युवाहरुले आज (मंगलबार) राजधानीमा प्रदर्शन गरेका छन् । मंगलबार बिहानै माइतीघर मण्डलामा भेला भएर उनीहरुले प्रदर्शन गरेका हुन् ।
रोजगारदाता देशहरुले खोपलाई अनिवार्य गरेका छन् । भिसालगायतका प्रक्रिया पूरा गरेका युवाहरु घण्टौँ लाइनमा बस्दा पनि खोप लगाउन नपाएपछि आक्रोशित हुँदै सडकमा निस्किएका हुन ।
महाराजञ्जस्थित नेपाल प्रहरीको २ नम्बर गणमा हिजो राती ९ बजेदेखि लाइनमा बसेका उनीहरुलाई आज बिहान ५ बजे प्रहरीले खोप सकिएको भनेपछि उनीहरु सरकार विरुद्ध नारा लगाउँदै माइतीघर मण्डला पुगेका थिए । वैदेशिक रोजगारीमा जानेहरुलाई खोप उपलब्ध गराउन सरकारले चरम बेवास्ता गरेको आरोप उनीहरुले लगाएका छन् ।
सरकारले वैदेशिक रोजगारीमा जानेहरुका लागि एक डोज मात्रै लगाए पुग्ने जोन्सन एण्ड जोन्सनको खोप लगाउने भने पनि खोपको मनपरी वितरणका कारण लक्षित वर्गमा खोप पुग्न नसकेको पाइएको छ । सोही खोप लगाउन हप्तौँदेखि कुरेको तर अन्तिममा खोप सकिएको भनेर आफूहरुलाई निराश बनाएको गुनासो पनि युवाहरुले गरेका छन् ।
उता, खोप कार्यक्रमका प्रमुख डा. झलक शर्माले हामीसँगको कुराकानीमा जोन्सन एण्ड जोन्सन खोपको मौज्दात सकिएको र थप खोप कहिले आउने भन्ने कुनै टुङ्गो नभएको जानकारी दिएका छन् । सरकारले खोपको व्यवस्थित वितरण गर्न नसक्दा वैदेशिक रोजगारीमा जाने हजारौँ युवा अलपत्र पर्ने अवस्था आएको छ ।
प्रकाशित मिति: मंगलबार, भदौ १५, २०७८
-1732776560.jpg)
