काठमाडौँ । प्रधानमन्त्री शेरबहादुर देउवाले अफगानिस्तानमा रहेका नेपालीहरूको उद्धारका लागि आइतबार निर्देशन गरिसकेको जानकारी दिएका छन् । उनले सोमबार सामाजिक सञ्जाल फेसबुकमार्फत अफगानिस्तानमा रहेका नेपालीको उपस्थिति र स्थितिको तथ्य लिन र अत्यावश्यक स्थितिमा उद्धार प्रबन्ध मिलाउन आइतबार निर्देशन गरिसकेको जानकारी दिएका हुन् ।
उनले अफगानिस्तानमा रहेका नेपालीहरूका लागि आवश्यक समन्वय र अभिभावकत्व सरकारको दायित्व भएको बताए । सरकारले उक्त जिम्मेवारी सजगता र गम्भीरतापूर्वक निभाउने उनले उल्लेख गरेका छन् ।
उनले फेसबुकमा लेख्दै भनेका छन्, ‘अफगानिस्तानमा नेपालीको उपस्थिति र स्थितिको तथ्य लिन र अत्यावश्यक स्थितिमा उद्धार प्रबन्ध मिलाउन आइतबार निर्देशन गरिसकेको छु, सुरक्षा र उद्धार प्रतीक्षा गरिरहेका नेपालीका लागि आवश्यक समन्वय र अभिभावकत्व सरकारको दायित्व हो सजगता र गम्भीरतापूर्वक सरकारले यो जिम्मेवारी निभाउनेछ ।’२० वर्षदेखि अफगानिस्तानमा रहेको अमेरिकी सेना फिर्ता भएपछि लामो समयदेखि सत्ता सङ्घर्षको लडाइँमा रहेको तालिबानले आइतबार राजधानी काबुल कब्जा गरेसँगै सत्ता प्राप्त गरेको छ । अफगानिस्तानका राष्ट्रपति घानी देश छोडेर भागेका छन् ।
तालिवानले अफगानिस्तानमा रहेको युद्ध अन्त भएको दाबी गरेको छ । यद्यपि अफगानिस्तान तालिबानको कब्जामा आएपछि त्यहाँका नागरिकहरू भने त्रसित बनेका छन् । अमेरिकालगायत अन्य देशहरूले आफ्ना नागरिकहरूलाई स्वदेश फिर्ता गरिरहेका छन् ।
नेपालले पनि अफगानिस्तानमा रहेका नेपालीहरूको उद्धारका लागि विवरण सङ्कलन गरिरहेको छ ।
प्रकाशित मिति: सोमबार, साउन ३२, २०७८
-1732776560.jpg)
