काठमाडौं । दक्षिणकाली नगरपालिका–६ श्रीपञ्जल टोलमा रहेको फर्पिङ माध्यमिक विद्यालयले स्थापनाको ३६ हजार पाँच सय दिन (सय वर्ष) पार गरेको अवसरमा सोमबार विशेष समारोह आयोजना गरी खुसियाली साटासाट गरेको छ । सो खुसियालीमा प्रमुख सहभागी थिए प्रदेश तीनका मुख्यमन्त्री डोरमणि पौडेल, जो २०११ सालमा सोही विद्यालयमा अध्ययन गरेका विद्यार्थी थिए ।
‘कुनै बेला आफूले भुइँमा सुकुल ओछ्याएर कखरा सिकेको विद्यालयले सय वर्ष पार गरेर इतिहास रचेको विशेष अवसरमा सहभागी हुन पाउँदा गर्वले छाती निकै चौडा भएको छ,’ मुख्यमन्त्री पौडेलले भने, ‘फर्पिङ क्षेत्रको मात्र होइन, काठमाडौं उपत्यकाको मात्रै पनि होइन, मुलुककै शैक्षिक विकासमा फर्पिङ माविको अतुलनीय योगदान मिसिएको छ ।’
प्रधानाध्यापक कृष्णकुमार श्रेष्ठका अनुसार सो विद्यालयका शैक्षिक अभियन्ता ९५ वर्षीय गीर्वाणनाथ अर्याल, पूर्वसहसचिव जनार्दन पौडेल, दक्षिणकाली नगरप्रमुख मोहन बस्नेतलगायत हजारौं पूर्व विद्यार्थी मुलुकको राजनीति, शिक्षा, व्यापार, राष्ट्रसेवा, प्राविधिलगायत क्षेत्रमा सहभागी भएर विशिष्ट योगदान मिसाएको नजिर गौरव गर्नलायक छ ।
विक्रम संवत् १९५८ मा राणा प्रधानमन्त्री देव शमशेरले ब्राह्मण बालकहरूलाई कर्मकान्ड र संस्कृत सिकाउन स्थापना गराएको चारवटा भाषा पाठशालामध्येको एक लाम्पाटी भाषा पाठशाला नै आजको फर्पिङ उच्चमावि हो । प्रधानाध्यापक श्रेष्ठका अनुसार त्यसबेला राणाकालीन पारिवारिक किचलो र राजनीतिक अस्थिरताका कारण त्यो भाषा पाठशाला केही वर्ष चलेर त्यसै लथालिंग भएको थियो । तर पछि १९७६ मा डोल्लु निवासी पण्डित सूर्यनाथ पौडेलले तत्कालीन प्रधानमन्त्री चन्द्र शमशेरसँग गुनासो गरी फर्पिङ भाषा पाठशाला पुनः व्यवस्थित गराएका थिए, जसलाई विद्यालयले आफ्नो स्थापनाको समय मान्दै आएको छ ।
कार्यक्रममा शशीराज अर्याल तथा श्रीकृष्ण महर्जनलाई उत्कृष्ट शिक्षक तथा कक्षा १० का छात्र शिशम बलामीलाई उत्कृष्ट विद्यार्थीका रूपमा सम्मान गरिएको थियो । त्यस्तै
पूर्वशिक्षकहरू नन्दकुमारी श्रेष्ठ, रेणुका मल्ल, दीर्घसेवी शिक्षकहरू राजेश श्रेष्ठ, रामचन्द्र केसी, रतिकुमारी महाजु, सरस्वती बस्नेत, नन्दमान श्रेष्ठ, विद्यालयको शैक्षिक विकासमा सहयोग गर्ने संस्थाहरू रुक्मिणी फाउन्डेसन, साम्य मेमोरियल, सिपिसिएसका प्रतिनिधिलगायतलाई सम्मान गरिएको थियो ।
सो अवसरमा विद्यार्थीहरूले विभिन्न सांस्कृतिक झाँकी, नृत्य तथा शैक्षि प्रदर्शनी गरेका थिए ।
प्रकाशित मिति: मंगलबार, मंसिर १७, २०७६
-1732776560.jpg)
