काठमार्डौं : प्रतिनिधिसभाका सांसदहरूले वर्तमान सरकराले शान्ति सुरक्षा दिन नसकेको भन्दै सरकारको औचित्यमाथि प्रश्न उठाएका छन् । शून्य समयमा बोल्दै प्रतिपक्षी दल नेपाली कांग्रेसका सांसदहरूले यस्तो बताएका हुन् ।
कांग्रेस सांसद लक्ष्मी परियारले काठमाडौंको केन्द्र घट्टेकुलो, सुकेधारामामै बम विस्फाेट हुँदा सरकार किन निदाएको भन्दै आक्रोश व्यक्त गरिन् । ‘सरकार खोज्न जनता कहाँ जाने ? नेपाली जनताले सुख र शान्तिको अनुभूति गन पाउनुपर्छ’, उनले भनिन् ।
त्यस्तै कांग्रेस सांसद् बहादुरसिंह तामाङले शान्ति सुरक्षा दिन नसक्ने सरकारको औचित्य नहुने बताए । ‘दिउँसै शान्ति सुरक्षा दिन सकेन । सरकार के गर्दै छ ? असन्तुष्ट पक्षलाई वार्तामा ल्याउनुपर्नेमा दुई तिहाईको दम्भले अशान्ति फैलिएको छ । सुरक्षा दिन सक्दैन भने सरकारको औचित्य नै समाप्त हुन्छ’, उनले भने ।
त्यस्तै अर्का सांसद् लालकाजी गुरुङले पाँचथरदेखि घट्टेकुलाेसम्म श्रृंखलाबद्ध विस्फाेट हुँदा सरकार के हेरेर बसेको छ ? भन्दै प्रश्न गरे । उनले वार्ता र संवादबाट समस्याको समाधान गर्न पनि सुझाव दिए ।
सत्तारुढ दल नेकपाकी सांसद् शान्ता चौधरीले भने बम विस्फाेटको घटना निन्दनीय भएको बताउँदै यसका विरुद्ध सरकारलाई ठोस कदम चाल्न आग्रह गरिन् । उनले भनिन्, हत्या हिंसा निन्दनीय कार्य हाे । मुलुकले आतंक होइन समुन्नत नेपाल मागेको छ । गाेलाबारुद रोक्नुस् । सरकराले ठोस कदम चाल्नुपर्छ ।
प्रकाशित मिति: सोमबार, जेठ १३, २०७६
-1732776560.jpg)
