जनकपुरधाम : नेपाली काङ्ग्रेसका वरिष्ठ नेता रामचन्द्र पौडेलले तराई-मधेसलाई पनि समृद्धिको हिस्सेदार बनाउनुपर्ने खाँचो औँल्याएका छन् ।
नेपाल प्रेस युनियन धनुषाद्वारा आज जनकपुरधाममा आयोजित पत्रकार सम्मेलनमा उनले हिमाल, पहाड र तराईबीच पारस्परिक रूपमा एकताका आधारलाई बलियो बनाउनु जरुरी रहेको बताए ।
पौडेलले समृद्धिका लागि नेपालका सम्पदालाई साझा रूपमा प्रयोग गर्ने पद्धति बसालेमा नेपाली जनजीवन छिमेकी राष्ट्र चीन र भारतभन्दा पनि धनी र सुन्दर हुन सक्ने दाबी पनि गरे ।
मधेसवादी दलहरूले संविधान संशोधन गर्न नचाहने सरकारलाई समर्थन गरी मधेसी जनतालाई भ्रममा पार्ने कार्य गरेको चर्चा गर्दै उनले काङ्ग्रेसले संविधानमा भएको त्रुटिलाई सच्याउन चाहेको धारणा राखे ।
वरिष्ठ नेता पौडेलले प्रधानमन्त्री केपी शर्मा ओलीले अदालत र अख्तियारलाई पनि आफ्नो इशाराबाट निर्दिष्ट गरेको आरोप लगाउँदै वाइडबडी प्रकरणमा अदालत र अख्तियारको मौनताले अराजकता मौलाउँदै गएको बताए ।
अख्तियार ठूला काण्डलाई संरक्षण दिई ससाना काण्डमा मात्र केन्द्रित रहेको आरोप पनि उनले लगाए ।
-1732776560.jpg)
