बर्दिवास : प्रदेश नं २ का मुख्यमन्त्री मोहम्मद लालबाबु राउतले समृद्धि सबैको साझा चाहना भएको बताए ।
महोत्तरीको बर्दिवासमा उद्योग वाणिज्य सङ्घको आयोजनामा दोस्रो बर्दिवास महोत्सव–२०७५ को आज उद्घाटन गर्दै उनले प्रदेश सरकारको सम्पूर्ण ध्यान नै समृद्धिमा केन्द्रित भएको बताएका हुन् । समृद्धिका लागि उद्यम, कलकारखानाको विकास र कृषिमा आधुनिकीकरण अपरिहार्य भएकाले यस क्षेत्रमा लगानी लगाउन प्रदेश सरकारले आग्रह गरेको मुख्यमन्त्री राउतको भनाइ छ ।
प्रदेश सरकारले लगानीमैत्री वातावरण बिकासका लागि २० वर्षसम्म कर छुटको व्यवस्था गरेको छ, तपाईं लगानी गर्नुहुन्छ भने तत्परता देखाउनोस्, सरकारले तीन घण्टाभित्र उद्यम स्वीकृतिको सम्पूर्ण कानूनी प्रक्रिया पूरा गरिदिन्छ । प्रदेश सरकारले उद्यम स्थापनाका लागि जग्गासमेत उपलब्ध गराउने उनले प्रतिबद्धता जनाए ।
आजदेखि शुरु भएको महोत्सव १० दिनसम्म चल्ने छ । महोत्सवमा १०० भन्दा बढी सुपथ मूल्यका व्यापारिक कक्ष राखिएका सङ्घका अध्यक्ष प्रह्लाद क्षत्रीले बताए ।
-रासस
प्रकाशित मिति: शुक्रबार, चैत ८, २०७५
-1732776560.jpg)
