सोल : अमेरिका र उत्तर कोरियाबीच दोस्रो शिखर बैठकको तयारी भइरहेका बेला उत्तर कोरियाका उच्च सरकारी अधिकारीहरू चीन भ्रमणमा गएका छन् ।
अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच दोस्रो शिखर बैठक यही फेब्रुअरी २७ र २८ तारिखका दिन भियतनामको राजधानी हनोईमा गर्ने तय भइसकेको छ ।
शिखर बैठक तय भई तयारी भइरहेकै बेला ११ सदस्यीय उत्तर कोरियाली उच्च अधिकारीहरूको चीन भ्रमणलाई निकै महत्त्व र चासोका साथ हेरिएको छ । शिखर बैठकको तयारीका लागि भियतनाम जाने क्रममा उक्त टोली चीन पुगेको दक्षिण कोरियाको समाचार संस्था योन्हापले जनाएको छ ।
स्रोत नखुलाई लेखिएको उक्त समाचारमा उत्तर कोरियाली टोलीले चिनियाँ उच्च अधिकारीहरूसँग शिखर बैठककै बारेमा परामर्श गरेको उल्लेख गरिएको छ ।
अमेरिका र उत्तर कोरियाको शिखर बैठकलाई दक्षिण कोरिया र चीनले नजिकबाट नियाल्दै र कतिपय अवस्थामा सहजीकरण पनि गरिदिँदै आएका छन् ।
ट्रम्प र किमबीच यसअघि पहिलो शिखर बैठक गत वर्षको जुन महिनामा सिंगापुरमा भएको थियो । पहिलो शिखर बैठकमा उत्तर कोरियाले पूर्ण रूपमा निःशस्त्र हुने घोषणा गरे पनि त्यसको पूर्ण कार्यान्वयन हुनेमा कतिपयले अझै पनि आशंका गरिहेका छन् ।
अब हुन लागेको दोस्रो शिखर बैठकमा ट्रम्पले यो आशंकालाई न्यूनीकरण गर्दै थप विश्वास र सहकार्यको वातावरण बनाउने अपेक्षा गरिएको छ ।
