काठमाडौं : सन् २०२० मा जापानमा आयोजना हुने टोकियो ओलम्पिकअन्तर्गत महिला फुटबलको एसिया दोस्रो चरणको छनोटका लागि खेलतालिका सार्वजनिक भएको छ।
एसियाली फुटलब महासंघ ९एएफसी०ले बुधबार सार्वजनिक गरेको खेलतालिकाअनुसार दोस्रो चरणमा समूह ‘ए’मा नेपाल, भारत र म्यान्मासँगै इन्डोनेशिया परेका छन्। यस समूहको सबै खेल आगामी अप्रिल १ देखि ९ सम्म म्यान्मामा हुनेछ।
पहिलो चरणमा पनि यी तीनवटै राष्ट्रसहित बंगलादेश एउटै समूह परेका थिए, जसबाट म्यान्मा र भारत स्वतः छनोट हुँदा तेस्रो स्थानमा रहेको नेपाल उत्कृष्ट तेस्रो टोली बन्दै दोस्रो चरण पुगेको थियो।
यस्तै, समूह ‘बी’मा हङकङ, जोर्डन, भियतनाम र उज्वेकिस्तान छन् भने समूह ‘सी’मा चाइनिज ताइपेइ, इरान, फिलिपिन्स र प्यालेष्टाइन छन्। दोस्रो चरणबाट तीनवटा समूहको शीर्ष स्थानमा रहने टोलीहरू तेस्रो चरणमा प्रवेश गर्नेछन्।
यसअघि नै ‘बाई’ पाएर अस्ट्रेलिया, उत्तर कोरिया, दक्षिण कोरिया, चीन र आयोजक थाइल्याण्डले तेस्रो चरणको छनोटमा स्थान बनाइसकेका छन्। यी पाँच र दोस्रो चरण पार गर्ने तीनसहित कूल आठ टोलीबीच तेस्रो चरणको छनोट खेल हुनेछ, जसमा चाररचार राष्ट्रका दुई समूह हुनेछन्।
दुवै समूहको शीर्ष दुई स्थानमा रहने टोलीहरू अन्तिम चरणको छनोटका लागि छानिनेछन्। त्यसबाट प्लेअफ खेलाउँदै दुई टोली ओलम्पिकका लागि छनोट हुनेछन्। आयोजकका रूपमा जापान भने यसअघि नै छनोट भइसकेको छ।
पहिलो चरणमा म्यान्मामा भएको समूह ‘सी’अन्तर्गतका सबै तीन खेलमा बराबरी खेलेको नेपाल तीन अंकका साथ तेस्रो भएको थियो। नेपालले बंगलादेश, म्यान्मा र भारतसँग बराबरी खेलेको थियो। उक्त प्रतियोगितामा नेपालले खेलेको तीनवटै खेलमा बराबरी गर्दै दोस्रो चरणमा पुगेको थियो।
पहिलो चरणमा सहभागी १८ टोलीलाई चार समूहमा विभाजन गरेर प्रतिस्पर्धा गराइएको थियो।
प्रकाशित मिति: बिहीबार, फागुन २, २०७५ ०८:०६
