काठमाडाैं । शङ्खरापुर नगरपालिकाको साँखुमा मोटरसाइकल दुर्घटना हुँदा सिन्धुपाल्चोक मेलम्ची नगरपालिका ११ का २४ वर्षीय शिव सुनारको मृत्यु भएको छ ।
काठमाडौँबाट मेलम्ची जाँदै गरेको बा ६४प ६८०९ नम्बरको मोटरसाइकल साँखु बजार नपुग्दै ओरालोमा दुर्घटनामा परेको हो । उनीसँगै मोटरसाइकलमा सवार सोही ठाउँका घाइते सागर श्रेष्ठको नारायणटारस्थित शङ्खरापुर अस्पतालमा उपचार भइरहेको महानगरीय प्रहरी प्रभाग साँखुका प्रहरी निरीक्षक गोविन्द पन्थीले जानकारी दिए ।
प्रहरीका अनुसार उक्त मोटरसाइकल नेपाली नम्बर प्लेट र भारतीय नम्बर प्लेटका २ स्करपियोमा ठोक्किएर दुर्घटना भएको हो ।
चाबहिलबाट साँखु जाँदै गरेको बा १६ च ८७७० नम्बरको स्करपियो सडकको बीचमा रोकिराखेको र उक्त स्कारपियोले ढोका खोल्दा मोटरसाइकल ढोकामा ठोक्किएर अनियन्त्रित भई विपरीत दिशाबाट आउँदै गरेको बीआर ०६ पिडी ४०५९ नम्बरको भारतीय स्कारपियोले थप ठक्कर दिएको हुनसक्ने प्रहरीको भनाइ छ ।
प्रहरीले दुवै स्कारपियो चालकलाई नियन्त्रणमा लिएर सोधपुछ गरिरहेको छ ।
प्रकाशित मिति: मंगलबार, पुस २९, २०७६ ०६:५४
