काठमाडाैं । नेपाली कांग्रेसका पूर्वसहमहामन्त्री गाेविन्दराज जाेशीलाई कारबाही गरी पार्टीबाट ५ वर्षका लागि निस्कासन गरेकामा पार्टीभित्रै चर्काे आलाेचना भएकाे छ ।
पार्टीकाे अनुशासनवपरीत काम गरेकाे र पटकपटक सचेत गराउँदा पनि सुधार नभएकाे भन्दै शनिबार जाेशीसहित ३ जनालाई पार्टीले निस्कासन गरेकाे थियाे ।
उनीहरूलाई निस्कासन गरेपछि पार्टीका केन्द्रीय सदस्य शेखर कोइरालाले साे निर्णयकाे विरोध गरेका छन् ।
सामाजिक सञ्जाल ट्विटरमा स्टाटस लेख्दै काेइरालाले यस निर्णयलाई पार्टीका लागि दुर्भाग्यपूर्ण भनेका छन् । उनीहरूले पार्टी र लोकतन्त्रका पक्षमा बगाएको रगत पसिनाको अवमूल्यन गरेकाे भन्दै उनले ट्विटरमा लेखेका छन्, 'आधारहीन र मनगढन्ते तर्क अगाडि सारेर गोविन्दराज जोशी, पुष्करनाथ ओझा र रामबहादुर बिष्टलाई कांग्रेस पार्टीबाट निस्कासन गरिनु दुर्भाग्य हो । उहाँहरूले पार्टी र लोकतन्त्रका पक्षमा बगाएको रगत पसिनाको अवमूल्यन गर्ने काम भएको छ ।'
‘एकातिर हामी अन्य पार्टीबाट नेपाली कांग्रेसमा प्रवेश गराउँदै छौं । अर्कोतिर आफ्नो सम्पूर्ण जीवन पार्टीमा व्यतीत गरेका वरिष्ठ नेताहरूलाई पार्टीबाट निस्कासन गर्छौं । यसले पार्टी र कार्यकर्तामा के सन्देश जान्छ ?,’ कोइरालाले भनेका छन् ।
यसैगरी नेपाली कांग्रेसका अर्का प्रभावशाली नेता डा मीनेन्द्र रिजालले पनि पार्टीकाे निर्णयकाे चर्काे विराेध गरेका छन् । सामाजिक सञ्जालमा रिजालले लेखेका छन्, 'हिजो पार्टीले कारबाही गर्या साथीहरूको नाम पढें, सजाय हेरें, आजसम्म मन तरंगीत छ। बीपीहरूले निर्माण गर्नु भएको हाम्रो पार्टीले शनै:शनै: उदार लोकतान्त्रिक चरित्र गुमाउने पो हो कि भन्ने आशंकाले मन झनै गह्रुङ्गो भयो ।'
यसैगरी सामाजिक सञ्जालमा टीकाप्रसाद ढकाल नेपाली कांग्रेस स्वार्थकाे खेलमा अग्रपंक्तिमा रहेकाे भन्दै लेख्छन्, 'स्वार्थको लडाईंमा प्रतिपक्ष काँग्रेस अझै एक कदम अगाडि छ। आफ्ना पूर्व सह-महामन्त्री गोविन्दराज जोशीलाई आजै पार्टीबाट निस्कासन ग-यो । राप्रपाका पूर्व महामन्त्री सुनिल थापालाई सीधै काँग्रेसको सहमहामन्त्री नियुक्त गर्ने तयारी पनि आजै पूरा भयो।'
यसैगरी कांग्रेसकी युवा नेतृ मनिता घिमिरे फेसबुकमा लेख्छन्, 'आजको अवस्थामा निष्ठाको राजनीति कसले पो गरेको छ ? गोविन्दराज जोशी जत्तिको मान्छेलाई पार्टी बाट निस्कासन गर्नु भनेको कांग्रेसका लागि अर्को दुर्भाग्य हो । उचित व्यवस्थापन गरी समेट्न सक्नुपर्थ्याे ।'
यसैगरी ट्विटरमा बाबुलाल भण्डारी व्यंग्य गर्दै लेख्छन्, 'देउवाजी, रामचन्द्रजी र आरजूलाई निर्वाचनमा असहयोग गरेमा मात्र नेपाली कांग्रेसभित्र अनुशासन भङ्ग गरेको ठहर हुने रहेछ ! अन्यत्र पनि बागी उम्मेदवारी र अन्तर्घातका उजुरी थिएनन् र ? कौन पुछे खेसरीका दाल, हैन ?'
जोशी र ओझालाई ५ वर्ष र विष्टलाई ३ वर्षका लागि पार्टीबाट निस्कासित गरिएको पार्टीले जनाएकाे छ ।
प्रकाशित मिति: आइतबार, साउन ११, २०७७ १२:०५
