काठमाडाैं । आन्तरिक विवाद बढ्दै गएपछि सत्तारुढ नेपाल कम्युनिस्ट पार्टी (नेकपा) का केन्द्रीय सदस्यहरूले केन्द्रीय कमिटी बैठक बोलाउन माग गर्दै हस्ताक्षर संकलन सुरु गरेका छन् ।
केन्द्रीय सदस्य ठाकुर गैरेकाे नेतृत्वमा नेताहरुले पार्टीभित्र देखिएको तीव्र मतभेदबारे छलफल गराउन केन्द्रीय कमिटी बैठकको माग गरेर हस्ताक्षर संकलन थालेका हुन् ।
असार १० गतेदेखि जारी पार्टीको स्थायी कमिटीे बैठकमा अधिकांश सदस्यले अध्यक्ष तथा प्रधानमन्त्री केपी शर्मा ओलीको राजीनामा मागेपछि नेकपाकाे कलह छताछुल्ल भएकाे छ ।
विवाद बढ्दै गएपछि स्थायी कमिटी बैठक नै स्थगित गरेर शीर्ष नेताहरु छलफलमा जुटेका छन् । तर आइतबार भएकाे २ अध्यक्षबीचकाे छलफलले पनि कुनै निष्कर्ष निकाल्न सकेन । उनीहरू भाेलि फेरि छलफल गर्ने भन्दै उठेका थिए ।
नेकपामा कुनै विषयमा स्थायी कमिटीले निर्णय गरे पनि अनुमोदनका लागि केन्द्रीय कमिटी बोलाउनुपर्ने र निर्णय गर्न सकेन भने पनि केन्द्रीय कमिटीले छलफल गरेर निकास दिन सक्ने नेता गैरेले बताए ।
उनका अनुसार पार्टी विभाजन केन्द्रीय कमिटीलाई स्वीकार्य नहुने भएकाले एकतालाई बलियाे बनाउने उद्देश्यले हस्ताक्षर अभियान चलाइएको हाे ।
प्रकाशित मिति: आइतबार, असार २१, २०७७ १२:२१