काठमाडौं । सत्तारुढ दल नेपाल कम्युनिस्ट पार्टी (नेकपा)का सांसद कृष्णकुमार श्रेष्ठले समाजवादी पार्टीका सांसद डा. सुरेन्द्र यादवको अपहरण गरेको आरोप पुष्टि भए आफू झुण्डिएर मर्न तयार रहेको बताएका छन् ।
सरकारको नीति तथा कार्यक्रममाथि प्रतिनिधि सभामा सोमबार भएको छलफलमा बोल्ने क्रममा श्रेष्ठले आरोप प्रमाणित भए आफू झुण्डिन तयार भएको दाबी गरे ।
‘सभामुख महोदय, केही हप्ताअगाडि यहाँ सांसद अपहरणको कुरा आएर म लगायत महेश बस्नेतको चरित्रहत्या गर्ने काम जुन भयो, म सम्पूर्ण माननीयजयुहरुलाई साक्षी राखेर भन्न चाहन्छु, अपहरणको आरोप लगाउनेलाई चुनौती दिन चाहन्छु, यदि प्रमाणित भयो भने सबै माननीयको अगाडि झुण्डिएर मर्न तयार छु । के हामीलाई आरोप लगाउने डाक्टरहरू झुण्डिन तयार छन् ?’
विवादास्पद अध्यादेशसंँगै पार्टी फु्टाउने षडयन्त्र अनुसार, प्रधानमन्त्री केपी ओलीको निर्देशनमा सांसद डाक्टर सुरेन्द्र यादवलाई सर्लाहीबाट अपहरण गरि काठमाडौं ल्याउने काम गरेको भन्दै जनता समाजवादी पार्टीका सांसद डाक्टर बाबुराम भट्टराईलगायतले सांसद श्रेष्ठ, महेश बस्नेत र निर्वतमान प्रमुख प्रमुख सर्वेन्द्र खनाल विरुद्ध जिल्ला सरकारी कार्यलय काठमाडौंमा मुद्दा दर्ता गरेका छन् ।
प्रकाशित मिति: सोमबार, जेठ ५, २०७७ ०८:४८