काठमाडौं । प्रमुख प्रतिपक्षी दल नेपाली कांग्रेसले भारतले जारी गरेको नक्सामा नेपालको अभिभाज्य भूमि समाहित गरेकोमा विरोध गरेको छ । सीमा विवाद सल्ट्याउने जिम्मा अब प्रधानन्त्री केपी शर्मा ओलीको काँधमा आएकाे पनि कांग्रेसकाे भनाइ छ ।
‘सीमा विवाद हल गर्ने जिम्मेवारी अब प्रधानमन्त्रीको हो। सर्वपक्षीय भेलामा सबैले सुझाव दिइसकेका छौं,’ पार्टी कार्यालयमा मंगलबार पत्रकार सम्मेलन गर्दै पार्टी प्रवक्ता विश्वप्रकाश शर्माले भने, ‘अब बल प्रधानमन्त्रीको खुट्टामा छ। सीमा विवाद हल गर्ने विषयमा सरकारको भूमिका नियालिरहेका छौं।’
यसैगरी कांग्रेसले अनसनरत डा गोविन्द केसीको माग सम्बोधन गर्न सरकारले चाँडो वार्ता टोली गठन गर्नुपर्ने पनि माग गरेको छ । पत्रकार सम्मेलनमा प्रवक्ता शर्माले भने, ‘डा केसीको अवस्था प्रतिकुल बन्दै गएको छ । अनसन थालेको ९ दिनमा लागेको छ । सरकारले चाँडो वार्ता टोली गठन गरी जायज माग पुरा गरोस् । उहाँको ज्यानको रक्षा होस् ।’
मेडिकल क्षेत्रको व्यापक सुधारको माग गर्दै डा केसीले डडेल्धुरा पुगेर अनसन थालेका हुन् । त्यसैगरी प्रवक्ता शर्माले निर्वाचनमा सत्तारुढ दलले आचारसंहितामा रहेर स्वस्थ प्रतिस्पर्धा गर्न समेत आग्रह गरेको छ ।
प्रकाशित मिति: मंगलबार, कात्तिक २६, २०७६ १०:२६