फिदिम । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ ले दुई छिमेकी मुलुकसँगको सम्बन्ध नयाँ उचाइमा पुगेको बताएका छन् । ‘चिनियाँ राष्ट्रपति सी चिनफिङको नेपाल भ्रमण र नेपाल–भारत पेट्रोलियम पाइपलाइन सञ्चालनले दुई देशबीचको मैत्रीपूर्ण सम्बन्धलाई नयाँ उचाइमा पुर्याइएको छ’,
फिदिममा आज पत्रकारसँग कुराकानी गर्दै उनले भने, ‘चिनियाँ राष्ट्रपतिको भ्रमणबाट दुई मुलुकको सम्बन्ध थप विस्तारित एवम् सुदृढ भएको छ ।’
अध्यक्ष दाहालले चिनियाँ राष्ट्रपतिले नेपालको विकासमा देखाएको तत्परताबाट नेपालले ठूलो फाइदा उठाउन सक्ने बताउँदै नेपाल–भारत पेट्रोलियम पाइपलाइन सञ्चालन एक सामान्य कुरा नभइ सम्बन्धलाई नयाँ चरणमा पुर्याउने घटना भएको बताए ।
संक्रमणकालीन मुद्दा टुङ्ग्याउने काम अन्तिम चरणमा पुगेको भन्दै उनले हिजो मात्रै सत्तारुढ र प्रतिपक्षी नेताबीच संक्रमणकालीन मुद्दा चाँडो टुंग्याउने विषयमा समझदारी भएको जानकारी दिए । अध्यक्ष दाहालले द्वन्द्वकालीन घटनाका पीडितको सहमतिमा शान्ति प्रक्रियाको सबै काम टुंगो लाग्ने विश्वास व्यक्त गरे ।
फरक प्रसंगमा अध्यक्ष दाहालले पार्टी एकताको काम अन्तिम चरणमा पुगेको भन्दै चाँडै प्रदेशस्तरमा प्रशिक्षण कार्यक्रम आयोजना गरी पार्टी नयाँ अभियानमा जाने बताए । यस सम्बन्धमा हिजो प्रधानमन्त्री एवं पार्टीका अर्का अध्यक्ष केपी शर्मा ओलीसँग विस्तृत कुरा भएको उनको भनाइ छ ।
पत्रकारहरुको जिज्ञासामा उनले मन्त्री हेरफेर गर्ने विषय प्रधानमन्त्रीको क्षेत्राधिकारको विषय भएको बताए । अध्यक्ष दाहालले सरकार संवैधानिक समस्यामा नपर्न कानून र ऐन निर्माणमा केन्द्रित हुँदा पहिलो वर्ष विकास निर्माण लगायत समग्र पक्षमा ध्यान पुर्याउन नपाएको बताउँदै उक्त आधार वर्षलाई टेकेर सरकार नयाँ जोश र जागरसहित अघि बढ्ने विश्वास व्यक्त गरे ।
नेकपा पाँचथरले आयोजना गरेको अगुवा कार्यकर्ता भेला तथा प्रशिक्षणमा सहभागी हुन अध्यक्ष दाहाल फिदिम पुगेका हुन् ।
प्रकाशित मिति: मंगलबार, कात्तिक ५, २०७६, १६:०४:००
