भक्तपुर । भूमि व्यवस्था, सहकारी तथा गरिबी निवारण मन्त्री पद्मालकुमारी अर्यालले कागज मिलाउन जान्नेलाई नभएर सही रूपमा जनताको पक्षमा काम गर्नेलाई विकास योजनाका काम दिन स्थानीय जनप्रतिनिधिहरूलाई आग्रह गरेकी छिन् ।
राष्ट्रिय सहकारी महासंघ लिमिटेडले मन्त्रालयको सहयोगमा 'प्रदेश तथा स्थानीय तहको समृद्धिका लागि सहकारी' विषयमा आयोजना गरेको दुई दिने प्रादेशिक गोष्ठीलाई आइतबार भक्तपुरमा सम्बोधन गर्दै मन्त्री अर्यालले यस्तो बताएकी हुन् ।
मन्त्री अर्यालले खासगरी योगना बाँडफाँडका क्रममा हुने गरेका बेथितिलाई इङ्गित गर्दै कागज मिलाएर व्यक्तिगत स्वार्थमा प्रयोग गर्नेलाई नभएर सही रूपमा जनताको काममा योजना लगाउनेलाई काम दिन आग्रह गरिन् । ‘योजना माग्न आउँदाखेरि कागज बनाएर ल्याउनेलाई मात्र योजना नदिनुस् । काम गर्नेले पाउँदैन । कागज बनाउनेले पाउँछ । कागज बनाउनेले पाउँछ, निजी स्वार्थमा प्रयोग गर्छ । सबै जनतालाई समेटेर काम गर्नेले योजना पाउँदै पाउँदैन’, मन्त्री अर्यालले भनि, ‘किनकि उसको नेतासँग पहुँचै छैन । र उ दिनदिनै आउन पनि भ्याउँदैन । अनि भेट्न पनि सक्दैन ।’
त्यसकारण अब योजना बाँडफाँड गर्दा यस्ता कुरालाई पनि ध्यान दिन मन्त्री अर्यालले आग्रह गरिन् । उनले भनिन्, 'कागज मिलाउनेलाई होइन काम गर्नेलाई योजनाका काम दिनुस् । अब हामीले कागज मिलाउनेलाई होइन काम गर्नेलाई भन्ने हिसाबले केही न केही हिजोभन्दा फरक हुनेगरी हामी अगाडी बढौं ।'
जनताको अपेक्षा यही पनि यही भएको भन्दै उनले अहिले सरकार ठिक स्प्रिटमा अगाडि बढिरहेको बताइन् । तर अहिले पनि निराशा बढाउने कोसिस गरिए पनि निराश हुनपर्ने कारण भने नभएको उनको भनाइ थियो ।
प्रकाशित मिति: सोमबार, ६ असोज २०७६
