काठमाडौं । नेपाल र चीनबीच महत्त्वपूर्ण ३ बुँदे सम्झौता भएको छ । चिनियाँ विदेशमन्त्री वाङ यीको नेपाल भ्रमणका क्रममा सोमबार मूख्य ३ बुँदामा सम्झौता भएको हाे ।
काठमाडौंको याक एण्ड यती होटलमा उच्चस्तरीय वार्तापछि हस्ताक्षर भएका तीन नयाँ सम्झौतामा मनाङमा अस्पताल निर्माण, गृह मन्त्रालयलाई ५ हजार टेन्ट उपलब्ध गराउने र नेपालमा चिनियाँ भाषा सिकाउन चीनबाट स्वयमसेवी शिक्षक ल्याउनेसम्बन्धी छन्।
मनाङमा अस्पताल बनाउने र टेन्टसम्बन्धी सम्झौतामा अर्थसचिव र चाइना डेभलपमेन्ट को-अपरेसनका उपाध्यक्षले हस्ताक्षर गरेका छन् भने स्वयंसेवक शिक्षकसम्बन्धी सम्झौतामा शिक्षा सचिवले हस्ताक्षर गरेका छन् ।
समझदारी पत्रअनुसार चीनले मनाङमा अस्पताल निर्माण गर्न नेपाललाई २ करोड २० लाख चिनियाँ युआन (३५ करोड ५७ लाख ४० हजार रुपैयाँ) दिने छ। यस्तै प्राकृतिक प्रकोपका बेला तत्काल पीडितलाई राहतस्वरुप उपलब्ध गराउने उद्देश्यले गृह मन्त्रालयलाई ५ हजार थान टेन्ट चीनले उपलब्ध गराउने भएकाे हाे ।
बैठक सम्पन्न भएपछि परराष्ट्रमन्त्री प्रदीपकुमार ज्ञवाली र चिनियाँ विदेशमन्त्री वाङ यीको उपस्थितिमा दुई देशका अधिकारीले समझदारीपत्रमा हस्ताक्षर गरी आदानप्रदान गरेका थिए ।
प्रकाशित मिति: सोमबार, भदौ २३, २०७६ २१:३६