काठमाडाैं । ऊर्जा, जलस्रोत तथा सिँचाइमन्त्री वर्षमान पुन ‘अनन्त’ र संयुक्त अरब इमिरेट्स (युएई) का राजदूत सइद हम्दान अल नाक्वेईबीच भेटवार्ता भएको छ। भेटवार्तामा द्विपक्षीय र आपसी सम्बन्धका विषयमा छलफल भएको थियो।
छलफलमा मन्त्री पुनले नेपालको ऊर्जा क्षेत्रमा लगानीको लागि उपयुक्त वातावरण बनेको भन्दै युएईका लगानीकर्तालाई नेपालमा लगानीको लागि प्रेरित गरिदिन आग्रह गरे। उनले दुई देशबीचको सम्बन्ध परापूर्वकालदेखि नै घनिष्ठ रहेको भन्दै आगामी दिनमा समेत सम्बन्ध अझै सुमधुर भएर अघि बढ्ने विश्वास व्यक्त गरे।
भेटमा राजदूत सइदले ऊर्जा क्षेत्रमा सरकारसँग काम गर्न युएई इच्छुक रहेको धारणा व्यक्त गरे। उनले युएईले पनि तेल र ग्यासको सट्टा ऊर्जामा ध्यान केन्द्रित गर्न लागेको जानकारी दिँदै नेपालमा पनि लगानीको लागि आफूले पहल गर्ने प्रतिबद्धता व्यक्त गरे।
२४औं विश्व ऊर्जा सम्मेलनमा भाग लिन युएई भ्रमणमा जान लागेका मन्त्री पुनलाई राजदूत सइदले आइतबार सिंहदरवारस्थित ऊर्जा मन्त्रालयमै पुगेर कार्यक्रमको बारेमा जानकारी गराएका थिए।
ऊर्जामन्त्री आजै युएई जाने
ऊर्जामन्त्री वर्षमान पुन ‘अनन्त’ युएईको तीन दिने भ्रमणमा जाने भएका छन् । युएईमा आयोजना हुन लागेको २४औं विश्व ऊर्जा सम्मेलनमा भाग लिन मन्त्री पुन आइतबार साँझ नेपाली प्रतिनिधिमण्डलको नेतृत्व गर्दै त्यसतर्फ प्रस्थान गर्ने कार्यक्रम छ। सम्मेलनमा ७० मुलुकका ऊर्जामन्त्रीहरुको सहभागिता हुनुको साथै विश्भरबाट ५ सयभन्दा बढी कम्पनीका कार्यकारी अधिकृत र दुई सय ५० जना वक्ताहरुको सहभागी समेत रहनेछ।
१ सय ५० देशको सहभागिता रहने उक्त सम्मेलनमा तेल, ग्यास, जलविद्युत, पूर्वाधार, ऊर्जा उत्पादन, वैकल्पिक ऊर्जा, नवीकरणीय ऊर्जा र ग्रिड प्रविधिको विषयमा छलफल हुने छ। मन्त्री पुनले सम्मेलनमा ऊर्जा, जल र खाद्य क्षेत्रको बारमो आफ्नो धारणा राख्ने कार्यक्रम छ। उनी भदौ २६ मा स्वदेश फर्किने कार्यक्रम रहेको प्रमुख स्वकीय सचिव दुर्गा चापागाईंले बताए।
प्रकाशित मिति: आइतबार, भदौ २२, २०७६ १८:०९
