काठमाडौं । संघीय संसदका लागि किनिएका गाडीमा समस्या आएपछि सोबारे छानबिन गर्न गठित समितिले प्रतिनिधिसभाका सभामुखलाई छानबिन प्रतिवेदन बुझाएको छ ।
संसदीय समितिका सभापतिका लागि किनिएका ११ वटा स्कर्पियो गाडीमा खराबी आएपछि सभामुख कृष्णबहादुर महराले राष्ट्रियसभाका सांसद रामनाराणय बिडारीको संयोजकत्वमा पाँच सदस्यीय समिति बनाएका थिए ।
सभामुखलाई बुझाइएको प्रतिवेदन सार्वजनिक नगरिए पनि गाडीको इन्जिनमा खराबी आएको नभई पार्टपुर्जा नक्कली भएको निष्कर्ष निकालेको बुझिएको छ । यसैगरी खरिद प्रक्रियामा कुनै पनि प्रकारको अनियमितता नपाइएको पनि समितिको निष्कर्ष छ ।
प्रतिवेदन बुझाउँदै समितिले यसबारे थप निर्णय गर्ने अधिकार भने सभामुखलाई नै दिएको छ । प्रतिवेदन बुझेपछि सभामुख महराले अध्ययन गरेर आवश्यक निर्णय लिने बताएका छन् ।
समितिले सार्वजनिक खरिद अनुगमन कार्यालयबाट सहसचिव बोलाएर सम्बन्धित कागजात अध्ययन गरेको थियो । त्यस्तै प्राविधिक पक्षबारे भौतिक पूर्वाधार तथा यातायात मन्त्रालयका प्राविधिक सहसचिवलाई जिम्मा दिएको थियो ।
संसदीय समितिका सभापतिहरुले नयाँ गाडीमा गियर सजिलै चेन्ज नहुने, स्टार्ट नहुने, अधिकांश गाडीमा सिसा खोल्न–लगाउन गाह्रो हुने, वाइफर आदिमा समस्या रहेको गुनासो गरेपछि कम्पनीले समस्या भएका सामान भने फेरिदिएको छ । संसद सचिवालयले ५५ लाख रुपैयाँ प्रतिगोटाका दरले ११ वटा स्कार्पियो अग्नि इन्कर्पोरेट प्रालिबाट खरिद गरेका थियो ।
छानबिन समितिमा सार्वजनिक लेखा समिति सभापति भरतकुमार साह, कानुन, न्याय तथा मानव अधिकार समिति सभापति पोखरेल, अर्थ समिति सभापति कृष्णप्रसाद दाहाल र दिगो विकास तथा सुशासन समिति सभापति तारादेवी भट्ट सदस्य छन् ।
प्रकाशित मिति: मंगलबार, भदौ १७, २०७६ १८:२५