दार्चुला : दुहुँ गाउँपालिका–३ स्थित निर्माणाधीन दार्चुला–तिङ्कर सडकको राताकाठामा पहिरो खस्दा १ जनाको मृत्यु भएको छ । २ जना घाइते भएका छन् ।
आज बिहान पहिरो खस्दा नौगाड गाउँपालिका–४ सिप्टीका ३९ वर्षीय रघुवीरसिंह धामीको घटनास्थलमै मृत्यु भएको प्रहरी नायब उपरीक्षक रवीन्द्र कठायतले जानकारी दिए । खलङ्गाबाट व्यास क्षेत्रमा भेडाबाख्रा लिएर जान लागेका धामी सडकमाथिबाट आएको पहिरोमा परेका थिए । नौगाड–४ का ३१ वर्षीय मानसिंह ठगुन्ना र वडा नं. ३ का उधारो ठगुन्ना घाइते भएका छन् ।
घाइते उधारोको टाउकोमा चोट लागेको जिल्ला अस्पतालका स्वास्थ्य सहायक डम्मरदत्त भट्टले जानकारी दिए । मानसिंहको हातमा चोट लागेको छ । दार्चुला–तिङ्कर सडकमा सोमबार विस्फोटक पदार्थ विस्फोटन गरिएको थियो । दिउँसो ओहोरदोहोरमा समस्या हुने भएपछि उनीहरू राती त्यही बाटो भएर व्यासतर्फ जाँदै थिए । दार्चुला–तिङ्कर सडक योजनाका इञ्जिनियर दिनेश रैखोलाका अनुसार अहिले सो सडक चौडा पार्ने काम भइरहेको छ । राती पानी परेका कारण पहिरो खसेको अनुमान गरिएको छ ।
प्रकाशित मिति: मंगलबार, फागुन १४, २०७५
-1732776560.jpg)
