काठमाडौं । केन्द्र र प्रदेश सरकारबीच देखिएका विवाद हल गर्ने संयन्त्रका रुपमा रहेको अन्तरप्रदेश परिषद्को बैठक आइतबार काठमाडौंमा बस्दैछ । बिहान ११ बजे सिंहदरबारमा बोलाइएको बैठकका लागि सातवटै प्रदेशका मुख्यमन्त्रीहरु काठमाडौं आइपुगेका छन् ।
यसअघि गत भदौ २४ गते बस्ने तय भएको बैठक स्थगित भएको तीन महिनापछि बस्न लागेको हो । भदौ २१ गते पोखरामा भएको मुख्यमन्त्रीहरुको भेलामा केन्द्र सरकारप्रति विभिन्न असन्तुष्टिहरु पोखिएका थिए । यसपटकको भेलामा तिनै असन्तुष्टिका एजेण्डामाथि छलफल हुने जनाइएको छ ।
पोखरा भेलामा मुख्यतया कर्मचारी व्यवस्थापन, परिषद्को ऐन तथा कार्यविधि, शान्ति सुरक्षा, प्रदेश लोकसेवा आयोग, प्रदेश प्रहरी ऐन, प्रदेश निजामति सेवा ऐन, जिल्ला स्तरका महत्वपूर्ण कार्यालय व्यवस्थापन, प्राकृतिक स्रोत तथा वित्त आयोग गठन र प्रदेशको भूमिका, रोयल्टी र राजस्व बाँडफाँड लगायतका विषयमा छलफल भएको थियो ।
यसपटक काठमाडौंमा हुने बैठकमा यी विषयका साथसाथै सातवटै प्रदेशको अहिलेको अवस्था, भोग्नुपरेका समस्या, ठूला विकास निर्माणका आयोजना र केन्द्रले गर्दै आएको हस्तक्षेप, अनुदान, स्रोत तथा साधन लगायतका विषयमा छलफल हुने जनाइएको छ ।
प्रधानमन्त्री अध्यक्ष रहने अन्तरप्रदेश परिषदमा १० सदस्यीय हुने संवैधानिक व्यवस्था रहेको छ । सातै प्रदेशका मुख्यमन्त्रीहरु यसका सदस्य रहन्छन् । साथै संघीय सरकारका गृहमन्त्री र अर्थमन्त्री पनि प्रदेश परिषदको सदस्य रहने व्यवस्था छ ।
प्रकाशित मिति: शनिबार, मंसिर २२, २०७५
