पोखरा । नेकपा एमाले कास्कीले भूमि व्यवस्था, सहकारी तथा गरिबी निवारण मन्त्री बलराम अधिकारीको राजीनामा माग गरेको छ।
एक अडियो सार्वजनिक भई मन्त्री अधिकारी ‘घुस डिल’ प्रकरणमा मुछिएपछि उनलाई कारबाही गर्नुपर्ने भन्दै कास्की एमालेले आवाज उठाएको हो।
शनिबार पोखरामा आयोजित विस्तारित भेलामा बोल्ने प्रमुख नेताहरूले मन्त्री अधिकारीको संलग्नताले पार्टीको गरिमामा आँच आएको भन्दै तत्काल पदबाट राजीनामा दिनुपर्नेमा जोड दिए ।
एमाले कास्की इन्चार्ज तथा केन्द्रीय सदस्य कृष्ण थापा र जिल्ला अध्यक्ष बैनबहादुर अधिकारी क्षेत्रीले मन्त्री अधिकारीको भूमिकालाई आपत्तिजनक ठहर गर्दै, सार्वजनिक रूपमै पद त्याग गर्न आग्रह गरे।
भेलामा वक्ताहरूले संघीय मामिला तथा सामान्य प्रशासन मन्त्री राजकुमार गुप्ताको राजीनामा यस सन्दर्भमा सकारात्मक उदाहरण भएको उल्लेख गर्दै भूमि मन्त्रीले पनि त्यसैअनुसार जिम्मेवारी लिनुपर्ने तर्क गरे।
घुस डिलमा मुछिएका सुजन लामाको सदस्यता नवीकरण नगर्ने निर्णय पनि सोही भेलामा लिइएको थियो। जिल्ला सचिव दर्शन लामाका अनुसार सो प्रस्ताव केन्द्रीय कमिटीमा पठाइएको छ।
एमाले कास्कीले सो अवसरमा ४७औं पुष्पलाल स्मृति दिवस साउन ५, ६ र ७ गते मनाउने निर्णयसमेत गरेको छ।
प्रकाशित मिति: शनिबार, साउन ४, २०८२
