काठमाडौं ।प्रधानमन्त्री सुशीला कार्कीले आफू मातहतका सबै मन्त्रालयका सचिवहरुलाई सिंहदरबारमा बोलाएर छिटोछरितो सेवा प्रवाह र भ्रष्टाचार नियन्त्रणमा कुनै पनि प्रकारको बहानाबाजी सह्य नहुने चेतावनी दिएकी छन्।
प्रधानमन्त्री तथा मन्त्रिपरिषद् कार्यालयसहित अन्य सात मन्त्रालयका सचिवहरूसँग गरेको विशेष बैठकमा उनले मन्त्रीको अनुपस्थितिलाई कारण देखाएर काम रोक्नु नपर्ने स्पष्ट संकेत गरिन्। अधिकार प्रत्यायोजन गरिसकिएको भन्दै उनले आवश्यक परे थप अधिकार दिन पनि तयार रहेको बताइन्।
‘हामी अस्थायी हौँ, तपाईंहरू स्थायी प्रशासन,’ भन्दै प्रधानमन्त्री कार्कीले सचिवहरूको अनुभव, दक्षता र भूमिकालाई निर्णायक ठहर गरिन्। उनले थपिन्, ‘बोलेर मात्र हुँदैन, कार्यान्वयन तपाईंहरूले नै गर्ने हो। त्यसैले नतिजामुखी भएर काम गर्नुहोस्, कुनै बहाना नहोस्।’
जेन–जी आन्दोलनले माग गरेको जस्तै प्रभावकारी सेवा र सफा प्रशासन सुनिश्चित गर्न सचिवहरूलाई गम्भीरतापूर्वक लाग्न आग्रह गर्दै उनले मन्त्री नहुँदा रोकिन आएका कामहरू तत्काल अगाडि बढाउन निर्देशन दिइन्।
प्रकाशित मिति: शुक्रबार, मंसिर ६, २०८२
