काठमाडौं । प्रधानमन्त्री सुशीला कार्कीले तोकिएको मितिमा शान्तिपूर्ण, भयरहित र व्यवस्थित रूपमा निर्वाचन सम्पन्न गराउनु सरकारको शीर्ष प्राथमिकता भएको स्पष्ट पार्दै राजनीतिक दलहरूलाई चुनावमा सहभागी हुन आग्रह गरेकी छन्।
बुधबार सिंहदरबारमा आयोजित सर्वदलीय बैठकलाई सम्बोधन गर्दै कार्कीले संसद् पुनःस्थापनाको अडान लिँदै चुनावी प्रक्रियाबाट पछि हट्ने कुनै पनि प्रयास लोकतान्त्रिक मार्गबाट विचलनको संकेत हुने बताइन्। उनका अनुसार, अबको राजनीतिक बहस संवैधानिक निकासका रूपमा निर्वाचनमै केन्द्रित हुन आवश्यक छ।
कार्कीले भनिन्, “लोकतन्त्रमा विश्वास गर्ने शक्तिका लागि चुनावबाट भाग्ने विकल्प कुनै पनि रूपमा वैध हुँदैन। पुनःस्थापनाको माग गर्दै संवैधानिक दायित्वबाट पलायन गर्नु लोकतन्त्रको अपमान हो।”
प्रधानमन्त्रीले मंसिर १० भित्रै निर्वाचन आयोगमा दल दर्ता गराउन सबै दललाई अपिल गर्दै त्यसलाई “राजनीतिक प्रतिबद्धताको न्यूनतम कसी” भन्दै चेतावनीसमेत दिइन्। उनका शब्दमा, “दल दर्ता नगर्ने वा चुनाव बहिष्कार गर्ने दलले लोकतन्त्रको सुरक्षाभन्दा अराजकता रोजेको ठहरिनेछ।”
हाल राजनीतिक माहोल तिव्र बन्दै गर्दा केही नेताहरूको द्वेषपूर्ण तथा भडकाउ अभिव्यक्तिले सामाजिक-राजनीतिक वातावरण दूषित बनेको भन्दै उनले कडा आपत्ति जनाइन्। यस्तो आचारसंहिता उल्लङ्घनका विरुद्धमा निर्वाचन आयोगले लिन चाहेका कुनै पनि कारबाहीमा सरकार पूर्ण रूपमा सहयोग रहने उनको भनाइ थियो।
सुरक्षाका दृष्टिले संवेदनशील जिल्लाहरूलाई ‘हट–स्पट’ का रूपमा वर्गीकृत गरी सादा पोशाकका सुरक्षाकर्मी तथा गुप्तचर तैनाथी बढाइएको जानकारी पनि उनले दिइन्। अराजक गतिविधि, भडकाउ प्रयास वा फरार अभियुक्तहरूबाट हुन सक्ने अवाञ्छित घटनालाई रोक्न अतिरिक्त सुरक्षा सतर्कता अपनाइएको उनले बताइन्।
राजनीतिक तनाव न्यून गर्न तथा सम्भावित विवाद व्यवस्थापनका लागि सबै पक्षसँग ट्रयाक–टु वार्ता र संवाद निरन्तर जारी रहेको कार्कीको भनाइ छ।
प्रकाशित मिति: बुधबार, मंसिर ४, २०८२
